Dollari, pranë nivelit më të ulët në 4 muaj – Jeni japonez, monedha me performancën më të dobët

Jeni japonez po qëndron në rënie në sesionin e sotëm, pasi Banka e Japonisë (BOJ) e mbajti në fuqi politikën monetare ultra-lehtësuese, siç pritej gjerësisht nga investitorët, por çuditërisht nuk sinjalizoi një ndryshim në të ardhmen.

Euro dhe dollari u rritën me rreth 1.3% përballë jenit, duke realizuar fitimet më të mëdha ditore që nga fundi i shtatorit. Guvernatori i Bankës së Japonisë, Kazuo Ueda deklaroi në konferencën për mediat se, “perspektivat për arritjen e objektivit të inflacionit po rriten gradualisht”.

Ndër monedhat e tjera, paundi dhe euro po realizojnë fitime në raport me dollarit amerikan, për shkak të pritshmërive se bankat qendrore në Europë do të jenë më konservatore se Rezerva Federale, në lidhje me uljen e normave të interesit.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102.5, pranë nivelit më të ulët në 4 muajt e fundit dhe në rënie me rreth 4% që nga fillimi i tetorit, kur Rezerva Federale sinjalizoi uljen e interesave vitin e ardhshëm.

Presidenti Rezervës Federale të Çikagos, Austan Goolsbee deklaroi të hënën se banka qendrore amerikane nuk po angazhohej paraprakisht për uljen e normave të interesit së shpejti. Për këtë arsye, investitorët po presin të dhënat mbi Indeksin e Çmimeve të Shpenzimeve të Konsumit Personal, masa e preferuar e Rezervës Federale për inflacionin bazë, që do të publikohen të premten. Ky raport do të ofrojë më shumë të dhëna mbi ecurinë e çmimeve dhe investitorët mund të përcaktojnë më me saktësi kohën se kur do të vijë ulja e parë e interesave.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.