Rregullatorët në SHBA miratojnë ETF-të në bitcoin – Tregtimi fillon të enjten, parashikohen flukse hyrëse prej $100 MLD

Rregullatori i letrave me vlerë në SHBA miratoi të mërkurën miratoi të mërkurën fondet e para të tregtuara në shkëmbim (ETF) të listuara në SHBA, për të gjurmuar bitcoin, një ngjarje që cilësohet si “gur themeli” për kriptomonedhën më të madhe në botë dhe industrinë më të gjerë të kriptove.

Komisioni i Letrave me Vlerë dhe Shkëmbimeve tha se miratoi plot 11 aplikacione, duke përfshirë BlackRock, Ark Investments/21Shares, Fidelity, Invesco dhe VanEck, pavarësisht paralajmërimeve nga disa zyrtarë se produktet mbartnin rreziqe. Shumica e produkteve kanë filluar tregtimin që të enjten, duke nisur një konkurrencë të ashpër për të fituar sa më shumë pjesë të tregut.

Sipas analistëve, miratimi i ETF-ve është vendimtar për bitcoin, pasi do t’u ofrojë investitorëve ekspozim ndaj kriptomonedhës më të madhe në botë, pa e zotëruar drejtpërdrejt atë. Gjithashtu, ETF-të pritet të ofrojnë një nxitje të madhe për industrinë e kriptove, që është shoqëruar shpesh herë nga skandale. Banka Standard Chartered vlerëson se ETF-të mund të tërheqin nga 50 deri në 100 miliardë dollarë vetëm këtë vit. Por, analistë të tjerë kanë thënë se flukset hyrëse do të jenë në rreth 55 miliardë dollarë, gjatë pesë viteve të ardhshme.

Kapitalizimi i tregut të bitcoin është në rreth 913 miliardë dollarë, referuar çmimit të së enjtes prej rreth 46,000 dollarë. Ndërsa, totali i aktiveve neto të ETF-ve në SHBA, është në rreth 6.5 trilionë dollarë. Lajmi se Komisioni i Letrave me Vlerë do të miratonte fondet ETF në bitcoin, bëri që kjo kriptomonedhë të rritet me rreth 70% në muajt e fundit, duke prekur këtë javë nivelin më të lartë që nga marsi i vitit 2022.

Analistët thonë se, suksesi në betejën për flukset hyrëse do të varet kryesisht nga tarifat dhe likuiditeti. Disa emetues ulën tarifat e tyre të propozuara në dosjet e reja këtë javë, duke përfshirë BlackRock dhe Ark/21Shares.

Këto tarifa variojnë nga 0.2% në 1.5%, ndërsa shumë firma ofrojnë të heqin dorë tërësisht nga tarifat për një periudhë të caktuar kohore. Mbi një dekadë më parë kriptomonedhat u krijuan si një alternativë ndaj monedhave tradicionale, si euro apo dollari, që emetohen dhe mbështeten nga një qeveri e caktuar, por janë përdorur kryesisht si investime spekulative, për shkak të paqëndrueshmërisë së tyre.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.