Rriten çmimet globale të ushqimeve – Mishi, vajrat vegjetale dhe drithërat kryesojnë “garën”

Indeksi bazë për çmimet botërore të ushqimeve u rrit në prill për të dytin muaj radhazi, i nxitur nga rritja e çmimeve të mishit, vajrave vegjetale dhe drithërave, sipas një raporti të Organizatës së Kombeve të Bashkuara për Ushqimin dhe Bujqësinë – FAO. Përkundrazi, çmimet e produkteve të qumështit dhe sheqerit ranë.

Indeksi i Çmimeve të Ushqimit, i cili gjurmon ndryshimet mujore në çmimet ndërkombëtare të një sërë artikujsh ushqimorë të tregtuar globalisht, rezultoi mesatarisht 119.1 në prill, 0.3% më shumë nga niveli i rishikuar i marsit, ndërsa ra me 9.6% krahasuar me nivelin e një viti më parë.

Indeksi i çmimeve të mishit u rrit me 1.6% në prill nga muaji i kaluar pasi çmimet ndërkombëtare për shpendët, gjedhët dhe delet u rritën. Çmimet botërore të mishit të derrit ranë në mënyrë margjinale, duke reflektuar kërkesën e brendshme të frenuar në Europën Perëndimore dhe uljen e vazhdueshme të kërkesës nga importuesit kryesorë, veçanërisht nga Kina.

Rritje pësuan gjithashtu edhe çmimet e drithërave. Indeksi i çmimeve u rrit me 0.3% nga marsi, duke i dhënë fund një serie humbjesh tre-mujore. Çmimet globale të eksportit të grurit mbetën të qëndrueshme në prill pasi konkurrenca e fortë midis eksportuesve kryesorë kompensoi shqetësimet për kushtet e pafavorshme të rritjes në pjesë të Bashkimit Europian, Federatës Ruse dhe Shteteve të Bashkuara të Amerikës. Çmimet e eksportit të misrit u rritën, të nxitura nga kërkesa e lartë.

Indeksi i çmimeve të vajit vegjetal gjithashtu u rrit me 0.3% nga marsi në nivelin më të lartë në 13 muaj. Çmimet më të larta për vajin e lulediellit kompensojnë çmimet më të ulëta për vajin e palmës dhe vajin e sojës.

Çmimi i sheqerit u ul me 4.4% për t’u mbyllur nën nivelin e prillit 2023. Kjo rënie lidhet kryesisht me perspektivën e përmirësuar të ofertës globale.

Çmimi i qumështit u ul me 0.3%, duke i dhënë fund gjashtë muajve radhazi të fitimeve, si pasojë e kërkesës së ulët për qumësht pluhur të skremuar dhe çmimeve më të ulëta globale të djathit, të rënduara nga një dollar më i fortë amerikan. Çmimet globale të gjalpit, në të kundërt, u rritën mes kërkesës së qëndrueshme.

Duhet theksuar se rritja e vazhdueshme e çmimeve të kakaos ka ndikuar edhe në inflacionin e ushqimeve dhe ka bërë që çokollatat dhe llojet e çokollatës të konsumuara në shumicën e vendeve të botës shumë më të shtrenjta.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.