Rritet deficiti tregtar në Kosovë – Llogaritet 418 milionë euro në qershor. Zgjerohet tregtia me Shqipërinë!

Të dhënat nga Tregtia e Jashtme e Mallrave në Kosovë tregojnë për një deficit tregtar në bazë vjetore më të lartë prej 30.5% në muajin qershor 2022, duke arritur 418.1 milionë euro. Ndërkaq, eksporti mbulon importin me 15.1%.

Eksporti i mallrave në muajin qershor 2022 kishte vlerën 74.6 milionë euro, ndërsa importi 492.8 milion Euro, që është një rritje prej 2.4% për eksport dhe 25.3% për import.

Sipas të dhënave të grupeve kryesore të eksportit: 24.3% e përbëjnë metalet bazë dhe artikujt prej tyre; 18.6% e përbëjnë artikujt e ndryshëm të prodhuar dhe 14.7% plastika, goma dhe artikujt prej tyre. Ndërsa, sipas të dhënave të grupeve kryesore për import: 16.4% e përbëjnë produktet minerale; 12.8% metalet bazë dhe artikujt prej tyre dhe 12.4% ushqimet e përgatitura, pijet dhe duhani.

Eksportet e Kosovës në vendet e BE-së arritën në 24 milionë euro, ose rreth 32.2% e eksporteve të përgjithshme, me një rritje prej 2.4%. Ndërsa, importet nga vendet e BE-së ishin rreth 192.4 milionë euro, ose 39% e importeve të përgjithshme, me një rritje prej 13%.

Në muajin qershor 2022, eksportet e Kosovës me vendet CEFTA-s arritën në 28.2 milionë euro, ose 37.8% të eksporteve të përgjithshme, me një rënie prej 2.8%. Partnerë kryesorë për eksport nga vendet e CEFTA-s ishin: Maqedonia e Veriut (13.4%), Shqipëria (12%), Serbia (5.8%) dhe Mali i Zi (5%).

Ndërsa, importet nga vendet e CEFTA-s në muajin qershor 2022, arritën në 92.8 milionë Euro, ose 18.8% të importeve të përgjithshme, me një rritje prej 17.7%. Vendet me pjesëmarrje më të lartë për import ishin: Serbia (6.8%), Maqedonia e Veriut (5.3%) dhe Shqipëria (5%).

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.