Rritet deficiti tregtar në Kosovë – Për korrikun ishte 15,8%. Eksporti mbulon importin me 15.2%

Kriza globale e lëndëve të para dhe sidomos ushqimeve ka ndikuar nëgativisht në ekonominë e të gjitha vendeve botërore, por më së shumti atyre vulnerabël. Të dhënat më të fundit të Agjencisë së Statistikave të Kosovës, tregojnë për një deficit tregtar më të lartë prej 15.8% në muajin korrik 2022, në bazë vjetore. Për sa më sipër, në vlerë monetare deficiti tregtar për këtë muaj arriti në 426.1 milionë euro, krahasuar me shifrën prej 367.8 milionë Euro në vitin 2021. Eksporti mbulon importin me 15.2%. Eksporti i mallrave kishte vlerën 76.2 milionë euro, ndërsa importi 502.4 milionë euro, duke regjistruar përkatësisht rritje vjetore prej 22.5% dhe 16.8%.

Sipas të dhënave të grupeve kryesore të eksportit: 26.1% e përbëjnë metalet bazë dhe artikujt prej tyre; 16.2% e përbëjnë artikujt e ndryshëm të prodhuar; 13.9% e përbëjnë plastika, goma dhe artikujt prej tyre; 8% e përbëjnë ushqimet e përgatitura, pijet dhe duhani; 7.6% e përbëjnë produktet minerale.

Ndërsa, sipas të dhënave të grupeve kryesore për import: 17.5% e përbëjnë produktet minerale; 13.2% e përbëjnë ushqimet e përgatitura, pijet dhe duhani; 11% e përbëjnë metalet bazë dhe artikujt prej tyre; 10.5% e përbëjnë makineritë, pajisjet mekanike dhe elektrike; 7.0% e përbëjnë mjetet e transportit; 6.6% industrisë kimike.

Eksportet e Kosovës në vendet e BE-së arritën në 26.4 milionë euro, ose rreth 34.6% e eksporteve të përgjithshme, me një rritje vjetore prej 29.8%. Partnerët kryesorë për eksportin e mallrave në BE janë: Gjermania (10.3%), Italia (4.7%), Danimarka (4.7%), etj.

Importet e Kosovës nga vendet e BE-së (27) ishin rreth 210.9 milionë euro, ose 42.0% e totalit të importeve, me rritje vjetore prej 8.6%. Partnerët kryesore për importet ishin: Gjermania (10.6%), Greqia (8.4%), Italia (4.9%), etj.

Në muajin korrik 2022, eksportet e Kosovës me vendet e CEFTA-së arritën në 25.8 milion Euro, ose 33.9% të eksporteve të përgjithshme, me një rënie prej (-4.2%). Partnerë kryesorë për eksport nga vendet e CEFTA-së ishin: Maqedonia e Veriut (10.7%), Shqipëria (10.4%), Serbia (6.6), dhe Mali i Zi (4.7%).

Ndërsa, importet nga vendet e CEFTA-së në muajin korrik 2022, arritën në 88.4 milion Euro, ose 17.6% të importeve të përgjithshme, me një rritje prej 5.1%. Vendet me pjesëmarrje më të lartë për import ishin: Serbia (7.4%), Maqedonia e Veriut (4.5%), dhe Shqipëria (3.8%).

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.