Rritet numri i kompanive në shërbime financiare dhe sigurime – Analiza/ Si ka ndryshuar numri i bizneseve në 5 vitet e fundit

Në 5 vitet e fundit, numri i ndërmarrjeve aktive në sektorin e aktiviteteve financiare dhe të sigurimit është rritur ndjeshëm. Nga 1.297 ndërmarrje që numëroheshin në vitin 2019, në 2023-in llogariten gjithsej 1.507, rreth 210 më tepër se viti 2019. Vetëm gjatë vitit të shkuar janë krijuar 282 ndërmarrje të reja.

Numri më i vogël i ndërmarrjeve është shënuar në 2021-in, me përkatësisht 1.054. Në atë vit rezulton të jenë mbyllur rreth 322 ndërmarrje që ofronin shërbime financiare dhe që operonin në tregun e sigurimeve. Kjo shifër e lartë ishte pasojë e drejtpërdrejtë e pandemisë Covid-19, e cila bëri të mundur që shumë biznese të ndërprisnin aktivitetin e tyre. Sipas një ankete të Këshillit të Investimeve mbi ndikimin që ka pasur pandemia në biznese, rreth 86% e ndërmarrjeve patën deklaruar se pandemia i ndikoi negativisht dhe as nuk kanë pasur paraprakisht një plan të aprovuar emergjence.

Të dhënat nga INSTAT tregojnë se numri i përgjithshëm i ndërmarrjeve të reja të regjistruara në vitin 2023 ka qenë më i ulët se në vitin 2022. Shifrat flasin për 13.636 ndërmarrje të regjistruara gjatë vitit 2023, nga 15,700 të regjistruara gjatë vitit 2022. Ndërkohë në një hark kohor pesëvjeçar, viti i shkuar mban rekordin për numrin e ndërmarrjeve të aktivitetit financiar dhe sigurimeve.

Kjo tregon një ecuri pozitive për ndërmarrjet në sektorin e aktiviteteve financiare dhe të sigurimit krahasuar me ato që zhvillojnë aktivitete të tjera, gjë që tregon se është krijuar edhe një terren i përshtatshëm për zhvillimin e këtyre bizneseve. Të ardhurat e këtyre sipërmarrjeve janë shtuar dukshëm në vitin e fundit, ndërkohë që edhe individët e punësuar në këto sektorë rezultojnë ndër më të mirëpaguarit.

Paralelisht me sektorin e aktiviteteve financiare, edhe sektori i ndërtimit, hotelerisë dhe teknologjisë së informacionit shënuan një numër të lartë ndërmarrjesh të reja në vitin 2023.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.