Rritja ekonomike botërore – Fitch: Inflacioni dhe politikat kufizuese monetare ndikojnë në reduktim

Sipas Fitch Ratings, në prezantimin e perspektivës së ekonomisë globale, presionet globale të inflacionit vazhdojnë të intensifikohen, me pasoja gjithnjë e më negative për perspektivën e rritjes.

Mbylljet më të fundit në Kinë si pasojë e Kovid, shtojnë presionin në zinxhirin global të furnizimit e të prodhimit. Ndërprerjet e furnizimit me energji dhe ushqime nga lufta Rusi-Ukrainë kanë një ndikim më të shpejtë në inflacionin europian sesa pritej.

Presionet si pasojë e inflacionit po rriten gjithashtu në sektorin e shërbimeve, veçanërisht në Shtetet e Bashkuara të Amerikës dhe Mbretëri të Bashkuar, ku tregjet e punës nën trysni, po nxisin rritjen e pagave nominale. Fitch ka rishikuar gjerësisht dhe ashpër parashikimet për inflacionin, veçanërisht për Europën në gjysmën e dytë të vitit 2022.

Gjithashtu janë ulur parashikimet për rritjen e PBB-së botërore në 2022-in me 0.6 pikë përqindjeje që nga muaji mars kur shënohej në 2.9%. Rishikimi më i madh është për Kinën, ku pritet që rritja të bjerë në 3.7% këtë vit, nga 4.8% në mars. Janë ulur parashikimet dhe për rritjen në Shtetet e Bashkuara të Amerikës me 0.6% dhe në Eurozonë me 0.4%. Ndërsa në total parashikimet për rritjen botërore në vitin 2023 janë ulur me 0.1%.

Mbyllja e Shangai si pasojë e Kovid do të bëjë që PBB-ja e Kinës të bjerë në terma tremujorë të njëpasnjëshëm në tremujorin e dytë të 2022 dhe me politikën ‘zero’ Covid-19 ende në fuqi, nuk pritet një rikthim i shpejtë. Në eurozonë, inflacioni do të zvarritet në të ardhurat reale të konsumatorëve dhe industria gjermane po goditet nga ndërprerjet e zinxhirit të furnizimit dhe ngadalësimi i Kinës.

Ekonomia amerikane po përjeton një vrull afatshkurtër, me shpenzimet konsumatore të mbështetura nga rritja e fortë e vendeve të punës dhe pagave nominale. Por rritja pritet të ngadalësohet nga mesi i vitit 2023 në ritme pothuajse pozitive në terma tremujorë për të rezultuar në një shtrëngim më agresiv monetar. Parashikohet që rritja e SHBA-së të bjerë në 1.5% në 2023 dhe 1.3% në 2024. Përvoja historike tregon për një rrezik të konsiderueshëm të një recesioni të SHBA-së në vazhdën e shtrëngimeve të politikave monetare.

Sfidat e inflacionit janë bërë aq të theksuara sa bankat qendrore janë të detyruara të reagojnë, duke braktisur udhëzimet e mëparshme. Fitch Ratings paralajmëron se rreziku që inflacioni të jetë real në një kohë që ka një zhvillim të dinamikave të rritjes së cmimeve, është shumë i madh. Tregjet e punës janë shumë nën presion në SHBA dhe Mbretëri të Bashkuar, ku inflacioni i pagave është i lartë dhe në rritje ndërsa punëtorët i rezistojnë uljeve reale të pagave.

Në këtë kontekst, pritet të Rezerva Federale të rrisë normat e interesit në 3% në tremujorin e katërt të 2022 dhe në 3.5% në tremujorin e parë të 2023-të, pra mbi vlerësimet e tyre për normën neutrale dhe për rrjedhojë në një qëndrim “kufizues”. Aktualisht janë rritur dhe normat e interesit në Bankën e Anglisë: në 2% në tremujorin e katërt të 2022-të dhe 2.5% në tremujorin e parë të 2023-të.

Ritmi i rritjes së pagave është rritur edhe në eurozonë, megjithëse vetëm në 2.8%. Por me inflacionin afatshkurtër shumë më të lartë, pritet që BQE të rrisë normat me 100 pikë këtë vit, e ndjekur me 50 pikë në 2023. Norma kryesore e rifinancimit të BQE-së parashikohet të qëndrojë në 1.5% deri në tremujorin e dytë të 2023, pranë vlerësimeve të BQE-së për normë neutrale.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.