Rritje pagash për mësuesit – Manastirliu: Objektivi, të mos ketë rroga nën 90 mijë lekë në muaj. Fondi, 4 mld lekë

4 mld lekë do të jetë fondi në dispozicion për rritjen e pagave të mësuesve, nga korriku i vitit 2024.

Gjatë prezantimit të projektbuxhetit në Komisionin parlamentar të Ekonomisë dhe Financave, ministrja e Arsimit dhe Sportit, Ogerta Manastirliu tha se ende nuk ka një strukturë mbi nivelin e rritjes sipas kategorive, por shtoi se objektivi është që asnjë pagë të mos jetë nën 90 mijë lekë në muaj.

Në total, buxheti i Ministrisë së Arsimit dhe Sportit, pa përfshirë fondin e pagave për vitin që vjen parashikohet në 52.23 mld lekë apo 10.7% më shumë se viti 2023.

Ndërkaq, buxheti për investime, përfshirë fondet e huaja parashikohet në 5.66 mld lekë, teksa Mnastriliu përmendi disa nga shtyllat kryesore ku do të fokusohen këto shpenzime.

Vitin që vjen do të jenë 231 mijë nxënës që do të përfitojnë nga politika e librave falas, ku për klasat 1-3 do të jenë të rinj, ndërsa për klasat 4 – 9 librat do të jenë në përdorim.

Ndërkaq, sa i takon buxhetin për sportin, ai parashikohet në nivelin e 576 mln lekë.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.