“Çmimet për produktet bujqësore do vijojnë të rriten” – Alban Çakalli: Ka rënie të prodhimit, duhet subvencionim për të kompensuar humbjet

Çmimet për produktet bujqësore kanë hyrë në një spirale rritëse dhe duket se kjo tendencë do të vijojë edhe përgjatë muajve në vijim. Alban Çakalli, sipërmarrës në bujqësi, thotë se sektori i bujqësisë dhe blegtorisë në vendin tonë është në kushte jo fort të favorshme, kjo për disa arsye.

Rritja e çmimeve të inputeve bujqësore, subvencionet e pamjaftueshme dhe hera-herës selektive, mungesa e fuqisë punëtore, por edhe kushtet atmosferike kanë çuar në uljen e prodhimit, gjë që detyron fermerët të rrisin çmimet për produktet e tyre.

Çfarë dëmton produktet tona bujqësore po ashtu janë edhe importet, të cilat vijnë në një çmim më të reduktuar, duke dëmtuar konkurrencën në treg. I ftuar në emisionin “Box to Box”, Çakalli shtron nevojën e markimit të produkteve shqiptare si një mënyrë për të orientuar qytetarët, por njekohësisht apelon për hartimin e politikave në mbështetje të produkteve vendase.

Prej më shumë se një viti konsumatorët shqiptarë po përballen me çmime që kanë njohur një rritje në vlera thuajse dyshifrore. Ndikimi vihet re kryesisht tek frutat dhe perimet por edhe tek qumështi dhe nënproduktet e tij.

Por teksa nevojat në sektorin e bujqësisë janë të mëdha, fondet e parashikuara në buxhetin për vitin e ardhshëm kanë njohur tkurrje. Janë rreth 7 miliardë lekë ose rreth 70 milionë dollarë, të cilat do të shkojnë si mbështetje për fermerët nga 10 miliardë apo 100 milionë dollarë që u alokuan këtë vit.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.