Rritje rekord e burimeve të rinovueshme – IEA: Trefishimi i prodhimit të energjisë deri në vitin 2030 është i arritshëm

Objektivi për të trefishuar kapacitetin e prodhimit të energjisë elektrike nga burimet e rinovueshme deri në vitin 2030 është i arritshëm, pas një viti të cilësuar si “spektakolar” për sektorin. Dhe merita duhet t’i jepet të paktën pjesërisht Kinës, e cila po i bën një shërbim pjesës tjetër të botës, jo vetëm sepse drejton instalime të reja, por edhe sepse është kryesisht përgjegjëse për kolapsin e kostove, të cilat e bënë energjinë të gjelbër gjithnjë e më konkurruese në krahasim me lëndët djegëse fosile. Është kjo deklarata e Fatih Birol, drejtor i Agjencisë Ndërkombëtare të Energjisë – IEA, i cili komentoi rezultatet e raportit të fundit.

Në një përmbledhje të shkurtër Birol thekson se tashmë mund të themi se ndodhemi në trajektoren e duhur. Madje edhe vetëm duke zbatuar politikat aktuale, parashikohet që kapaciteti për të prodhuar energji elektrike nga burimet e rinovueshme të rritet dy herë e gjysmë deri në vitin 2028, vit në të cilin ndalojnë parashikimet e raportit. Prandaj, objektivi për ta trefishuar këtë deri në vitin 2030, duke arritur gjithsej 11 mijë Gigavat në botë, konsiderohet i “arritshëm”.

Megjithatë, qeveritë duhet të marrin pjesë në mënyrë aktive, duke ndjekur angazhimet e marra në Dubai. Dhe energjitë e rinovueshme duhet të marrin hov edhe në vendet në zhvillim, ku financimi i projekteve është bërë edhe më i vështirë me rritjen e normave të interesit: “Nevojitet përparim në Afrikë, Amerikën Latine, në Azi”, nxit Birol.

Në frontin e burimeve të rinovueshme, ndryshimi i drejtimit i regjistruar muajt e fundit ngjall shpresë. Në harkun kohor të një viti kapaciteti global u rrit me 50%, pra me mbi 500 Gigavat: diçka që është e barabartë me të gjithë energjinë elektrike, nga çdo burim, i instaluar në Francë, Spanjë dhe Gjermani së bashku.

Megjithatë, sektori mund të rritet edhe më shpejt, nëse nuk do të ishin pengesat e shumta që ende ekzistojnë: nga autorizimet që zgjasin në kohë deri te pamjaftueshmëria e rrjeteve, e cila ngadalëson lidhjen e impianteve të reja, duke shkaktuar – edhe në Europë dhe në Amerikën veriore – vonesa që zgjasin vite.

Në raport, IEA thekson se mbi 3.000 gigavat termocentrale diellore dhe të erës kanë ngecur ‘në radhë’, duke pritur për lidhje, në mbarë botën, nga të cilat rreth gjysma janë në një fazë të avancuar zhvillimi. Investimet në rrjete, rekomandon Agjencia, duhet të dyfishohen, duke kaluar 600 miliardë dollarë në vit deri në vitin 2030.

Raporti i IEA përmban parashikime shumë optimiste për depërtimin e burimeve të rinovueshme: në skenarin bazë, kapaciteti global do të rritet me 3700 GW në periudhën 2023-2028, dielli dhe era do të kapërcejnë hidrocentralet këtë vit, prodhimin e qymyrit vitin e ardhshëm dhe energjinë bërthamore deri në vitin 2026. Në vitin 2028, pjesa e gjenerimit do të jetë 25% në nivel global, dyfish në krahasim me sot.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.