Rrugë alternative për aeroportin e Rinasit – Tender 33.23 milionë lekë për aksin 6.7 kilometra

Shtimi i numrit të fluturimeve ajrore ka bërë që të shtohet edhe fluksi i automjeteve duke ngarkuar ndjeshëm aksin rrugor e duke prodhuar në këtë mënyrë trafik të rënduar në Rinas.

Për të ulur trafikun, Autoriteti Rrugor Shqiptar ka hapur tenderin për ndërtimin e një rrugë alternative. Tenderi ka vlerë 33.3 milionë lekë dhe parashikon rehabilitimin e rrugës së ish repartit ushtarak për në aeroportin e Rinasit. Rruga ka një gjatësi 6.7 kilometra.

Në një distancë rreth 1280 metrash përpara se të shkosh te rrethrrotullimi i Rinasit, në afërsi të repartit ushtarak, mendohet të ndërtohet një rampë dalëse e cila do të lidhë segmentin rrugor mbikalimi i Kasharit – Aeroporti i Rinasit me rrugën ekzistuese reparti ushtarak – sheshi i parkimit të Aeroportit.

Ndërtimi i kësaj rruge alternative, shkruhet në dokumentet e tenderit, do të lehtësojë sado pak trafikun e rënduar, pasojat e të cilit reflektohen më shumë në rrethrrotullimin e Rinasit.

Korsia hyrëse dhe segmenti rrugor i harkuar do të ndërtohet i ri (me një drejtim lëvizje), ndërsa pjesa e gjurmës ekzistuese do t’i nënshtrohet një rehabilitimi të shtresave asfaltike.

Vitet e fundit Shqipëria po njeh një rritje të ndjeshme të fluturimeve ajrore. Numri i pasagjerëve që kanë udhëtuar me linja ajrore, në Prill 2022 është më shumë se 386 mijë pasagjerë, duke u rritur me 3,8 herë, krahasuar me Prillin e vitit të kaluar.

E në rang 4 mujori, këtë vit Numri i pasagjerëve që kanë udhëtuar me linja ajrore, në 4-mujorin e këtij viti numri është 1.1 milionë  pasagjerë, duke u rritur me 3,3 herë, krahasuar me katërmujorin e parë të vitit të kaluar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.