Rumani, prodhimet ushqimore në rrezik për shkak të thatësirës – Pritet një rritje prej 40% e çmimeve të prodhimeve bazë

Mishi i derrit, drithërat dhe mjalti mund të kushtojnë deri në 40% më shumë në krahasim me vitin e kaluar. Të mbjellat janë në rrezik, ndërsa autoritetet po miratojnë ndryshime drastike të strategjisë dhe në planifikimin agrar.

Dhe në Rumani thatësira po shkakton dëme shumë të mëdha për sa i përket prodhimeve ushqimore. Dhe njëherë më shumë ekspertët fajësojnë për situatën mungesën e reshjeve dhe ndryshimet klimatike.

Fermerët paralajmërojnë për rritje cmimesh por dhe për sasi të reduktuara prodhimesh, për shkak se thatësira ka pasur një impakt shumë të madh në mbjelljet e vjeshtës si gruri dhe elbi, por dhe në ato pranverore si misri dhe luledielli.

Për këtë arsye pritet një rritje domethënëse e cmimit të produkteve bazë por dhe atyre të transformuara.

Edhe mishi i derrit do të bëhet më i shtrenjtë, pasi fermerët ende nuk janë rimëkëmbur nga rritja e cmimit të energjisë elektrike. Por gjithashtu pesë vjet më parë gripi i derrit ishte një goditje shumë e rëndë për sektorin. Sipas ekspertëve Rumania prodhon vetëm 20 – 25% të konsumit vendor për mishin e freskët të derrit. Situata në vend është aq alarmante sa administrata kombëtare e ujit në Rumani e ka cilësuar të domosdoshëm racionimin e përdorimit të ujit duke shmangur ujitjen e kopshteve dhe mbushjen e pishinave.

Ministria e ambjentit deklaroi një javë më parë se rezervat strategjike të Rumanisë janë të mbushura deri në 68% ndërsa 70% e vendit aktualisht është prekur nga thatësira.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.