Rusia vazhdon ofensivën ‘e sharmit’ të Afrikës ndërsa Lavrov mbërrin në Kongo!

Ministri i Jashtëm rus është në Kongo të hënën, si pjesë e ofensivës së ‘sharmit’ rus në Afrikë, që çon gjithashtu Sergei Lavrov në Egjipt, Ugandë dhe Etiopi. Lavrov mbërriti të dielën në mbrëmje në Oyo në Kongon veriore, rreth 400 km në veri të kryeqytetit Brazzaville dhe një bastion i presidentit kongolez Denis Sassou Nguesso.

Sassou Nguesszo dhe Lavrov do të zhvillojnë bisedime ballë për ballë të hënën dhe më vonë do të udhëtojnë në Ugandë dhe Etiopi në turneun e tij në Afrikë, i krijuar për të forcuar mbështetjen për Rusinë në skenën ndërkombëtare.

Ministria e Jashtme në Moskë akuzoi SHBA-në se po përpiqet të bindë liderët që të mos pozojnë për foto me Lavrov, “në mënyrë që Rusia të mos e përdorë këtë si provë se nuk është e izoluar”, dhe postoi një numër fotografish në mediat sociale të një Lavrov të buzëqeshur duke u përshëndetur ngrohtësisht nga ministri i Jashtëm kongolez Jean-Claude Gakosso në aeroportin ndërkombëtar Ollombo të Oyo-s të dielën mbrëma.

Përpara vizitës, Lavrov tha në një intervistë se Rusia kishte “marrëdhënie të mira të gjata me Afrikën që nga ditët e Bashkimit Sovjetik”. Lavrov vlerësoi rolin e Rusisë në dekolonizimin në Afrikë, duke thënë se “ne kemi ofruar ndihmë për lëvizjen nacionalçlirimtare dhe më pas për rivendosjen e shteteve të pavarura dhe ngritjen e ekonomive të tyre”.

Bisedimet e së hënës në Kongo shënojnë fazën e dytë të turneut të Lavrov me aleatët afrikanë.

Të dielën ai ishte në Kajro ku fillimisht zhvilloi bisedime me presidentin Abdel Fattah el-Sissi, më pas me homologun e tij egjiptian, Sameh Shukry. Lavrov u takua gjithashtu me Sekretarin e Përgjithshëm të Ligës Arabe, Ahmed Aboul Gheit, përpara se t’i drejtohej organizatës pan-arabe, tha Liga Arabe.

Në një konferencë të përbashkët shtypi me Shukry-n, Lavrov tha se ai diskutoi “operacionin ushtarak” të Rusisë në Ukrainë me zyrtarë egjiptianë të cilët kërkuan për një zgjidhje “politike dhe diplomatike” të konfliktit. Lavrov fajësoi Ukrainën për ndërprerjen e bisedimeve të mëparshme të paqes.

Diplomati rus përdori fjalimin e tij në Ligën Arabe për të shtyrë narrativën e Kremlinit se Perëndimi e shtyu vendin e tij të pushtonte Ukrainën dhe akuzoi Perëndimin për injorimin e shqetësimeve të sigurisë së Rusisë që rrjedhin nga zgjerimi i NATO-s drejt lindjes.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.