Sa kursejnë bizneset dhe qytetarët nga anëtarësimi në SEPA? – Ulen kostot për pagesat dhe transfertat, shqiptarët konsiderohen si pjesë e BE-së

Elisabeta Dosku/ SCAN

Brenda vitit të ardhshëm, Shqipëria pritet të bëhet anëtare me të drejta të plota në Zonën Unike të Pagesave në Euro (SEPA), proces që do të sjellë reduktim të theksuar të kostove të pagesave dhe transfertave për qytetarët dhe bizneset. I pranishëm në komisionin Parlamentar për Çështjet Europiane, Guvernatori i Bankës së Shqipërisë, Gent Sejko, theksoi se më 13 qershor është dorëzuar zyrtarisht aplikimin për anëtarësim në SEPA dhe pritshmëritë janë që brenda muajit Shtator të miratohet. Me aderimin në SEPA qytetarët dhe bizneset në Shqipëri kursejnë afro 20 milionë euro në vitin e parë.

“Pagesa ndërkufitare në euro më të lira, transfertat përmes SEPA, kosto do te jete minimalisht 5 here me e ulet se aktualisht. 58 % e tregtisë se mallrave kryhet me vendet e BE. Përfitimet ekonomike nga kryerja e pagesave janë të mëdha.  Kursimi në vitin e parë 20 milionë euro dhe më pas kursimi rritet në mënyrë progresive,” tha Gent Sejko, Guvernator i Bankës së Shqipërisë

Ministri i Financave, Ervin Mete, sqaroi se me anëtarësimin në këtë proces reduktohet gjithashtu koha e përpunimit të transfertave si dhe nxiten investimet e huaja direkte.

“ Qytetarët dhe bizneset do të kryejnë transferta dhe pagesa si të ishin qytetarët të BE-së.  Me aderimin në SEPA, kostot dhe koha e përpunimit reduktohen ndjeshëm duke lehtësuar tregtinë. Anëtarësimi në SEPA pritet të lehtësojë dhe të bëjë pak më të kushtueshme lëvizjet e fondeve nga vendet e BE për në Shqipëri për të lehtësuar investimet.  Kontribut në sektorin e turizmit duke u krijuar më shumë mundësi për ulje kostosh”.

Paralelisht bankat tregtare duhet të përshtatin sistemet e tyre në kuadër të përgatitjes për në SEPA.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.