Sa përdoret telefoni fiks në Shqipëri? – Rreth 634 mijë pajtimtarë me akses broadband në internet nga rrjete fikse

Rreth 171 mijë pajtimtarë përdorën linjën e telefonisë fikse në tremujorin e parë 2024. Referuar të dhënave nga Autoriteti i Komunikimeve Elektronike dhe Postare, numri i personave që përdorin një telefon fiks në shtëpi ose në biznesin e tyre, ka rënë me 1.2% krahasuar me periudhën e fundit të 2023-it dhe me 3.6% llogaritur me tremujorin e parë 2023.

Në fakt, linja e telefonisë fikse pritet që të ketë gjithnjë e më pak përdorues në vijim, pasi dihet që të rinjtë preferojnë të përdorin më tepër smartphone ose pajisje të tjera me internet për të komunikuar. Nga ana tjetër, numri i pajtimtarëve me akses broadband në internet nga rrjete fikse arriti në rreth 634 mijë në periudhën e parë të vitit, shifër që përbën një rritje me 0.3% në krahasim me tremujorin e mëparshëm dhe një rritje me 4.6% në krahasim me të njëjtin tremujor në vitin 2023.

Përdoruesit e rrjetit fiks që kanë akses në shërbime të integruara si telefoni, internet dhe televizor arriti në rreth 294 mijë në fund të marsit, një rënie kjo me 3.3% vlerësuar me tremujorin e parë 2023.

Qytetarët shqiptarë shpenzojnë më tepër për paketat internet dhe televizor. Ata që blejnë paketa trefishe (telefoni, internet dhe TV) përbëjnë 23.7% të totalit të pajtimtarëve me paketa të integruara ndërsa 30.3% janë vetëm me paketa “Internet dhe Telefoni” dhe 46% me paketa “Internet dhe TV”.

Përafërsisht 46% e pajtimtarëve me akses broadband në rrjete fikse në fund të 2023 ishin pajtimtarë me paketa të integruara, ku 11% ishin me paketa trefishe, telefoni, internet dhe televizor.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.