Sa shkëmben Shqipëria me Malin e Zi? – Analiza e shifrave/ Çfarë po i luhat importet
Mali i Zi, zë një pjesë të vogël në listën e vendeve të rajonit me të cilat Shqipëria ka shkëmbime tregtare. Megjithatë, ajo që konstatohet është një tendencë rritëse e ndjeshme e importeve.
Mesatarisht, Shqipëria eksporton në Mal të Zi mallra me vlerë 5 deri në 6 miliardë lekë në vit. E për importet, 2 deri në 4 miliardë lekë.
Po ajo që konstatohet vitin e fundit është se ndryshe nga eksportet, importet kanë njohur një rritje të konsiderueshme, duke u dyfishuar në vitin 2021 e duke arritur vlerën 4.6 miliardë lekë. Rritja më e madhe e importeve ndodhi në fund të vitit 2021, përkatësisht në nëntor dhe dhjetor, sidomos me grupmallrat ‘minerale, lëndë djegëse e energji elektrike’.
Por a po vijon kjo tendencë edhe gjatë këtij viti?
Referuar të dhënave të tregtisë së jashtme të publikuara nga INSTAT, rezulton se në periudhën janar-prill, Shqipëria ka importuar nga Mali i Zi mallra me vlerë rreth 1.9 miliardë lekë. Rritja, krahasuar me tremujorin e të njëjtës periudhë të një viti më parë është me rreth 1.2 miliardë lekë më shumë, raporton SCAN.
Ndikimin më të madh, me rreth 1.7 miliardë lekë, e zënë sërish grupmallrat ‘minerale, lëndë djegëse e energji elektrike’.
Sa i përket eksporteve, në periudhën janar-prill 2022, Shqipëria ka eksportuar në Malin e Zi mallra me vlerë 1,9 miliardë lekë, duke njohur rritje me rreth 100 milionë lekë më shumë se e njëjta periudhë e vitit të kaluar.
Shqipëria dhe Mali i Zi shkëmbejnë ushqime, minerale, lëndë djegëse e energji elektrike, materiale ndërtimi e metale, prodhime druri e letre si dhe tekstile dhe këpucë. Edhe për shkak të madhësisë dhe natyrës së ekonomisë, Mali i Zi nuk zë të njëjtën peshë sa dy vendet e tjera kufitare të Shqipërisë, Maqedonia e Veriut dhe Kosova, që gjithashtu po njohin ritme të forta të rritjes së shkëmbimeve tregtare.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.