Sa zgjat zhdoganimi në Shqipëri? – Studimi, në Morinë, koha mesatare 52 minuta, në Kapshtica 73 minuta, Qafë Thana 105 minuta

Korporata Financiare Ndërkombëtare (IFC) ka kryer në dhjetor të vitit 2021 një studim të Kohës së Zhdoganimit në pikat kryesore të kalimit kufitar në vend, nga I cili rezulton se pika kufitare e Morinës është më eficentja, ndërkohë që në Qafë Thanë procedurat zgjasin më shumë. Në studim është përfshirë edhe Porti I Durrësit, ku është vlerësuar kohëzgjatja e nevojshme për ngarkesat tregtare për t’iu nënshtruar procedurave të importit, eksportit dhe tranzitit.

Studimi ka zbardhur se në Morinë, koha mesatare e çlirimit të mallrave është 52 minuta, në Kapshtica 73 minuta ndërsa në Qafë Thana 105 minuta.

Sa I përket Portit të Durrësit, koha mesatare totale e zhdoganimit të mallrave është 201 minuta. Në zyrat doganore, koha mesatare e çlirimit të mallrave është 104 minuta. Në agjencitë doganore procedurat zgjasin 12 minuta, ndërsa në Policinë Kufitare 4 minuta.

Studimi nxjerr në pah se koha mesatare e zhdoganimeve në të gjitha pikat e përfshira në studim është ulur ndjeshëm në raport me vitin 2018.  Konkretisht, Në Portin e Durrësit, koha mesatare e çlirimit të mallrave është shkurtuar me 26%. Në zyrat doganore kufitare, koha mesatare e çlirimit të mallrave është shkurtuar me 20%. Në zyrat doganore të brendshme, koha mesatare e çlirimit të mallrave është shkurtuar me 74%.

Sa i përket eksporteve, në Portin e Durrësit, koha mesatare e çlirimit të mallrave është shkurtuar me 49%. Në zyrat doganore kufitare, koha mesatare e çlirimit të mallrave është shkurtuar me 4%. Në zyrat doganore të brendshme, koha mesatare e çlirimit të mallrave është shkurtuar me 4%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.