Serbia, ndërlidhje gazi me Bullgarinë – Projekti prioritar pritet të përfundojë vitin e ardhshëm

Zëvendëskryeministrja e Serbisë dhe ministre e Minierave dhe Energjisë, Zorana Mihajloviç, tha se ndërtimi i një ndërlidhjeje gazi me Bullgarinë ishte projekt prioritar për Serbinë, pasi do t’i siguronte vendit gaz nga disa furnizues. Por, ajo shtoi se lidhja me vendet e tjera të rajonit dhe ndërtimi i një objekti të ri nëntokësor të depozitimit të gazit ishin po aq të rëndësishme.

“Në krahasim me shumë vende europiane, ne nuk jemi në një pozitë më të keqe edhe pse jemi pothuajse njëqind për qind të varur nga gazi rus. Gjermania, gjithashtu është plotësisht e varur nga Rusia, që është një gabim i madh dhe nuk ka rëndësi se kush është furnizuesi, problemi është varësia nga një ofrues i vetëm”, deklaroi numri dy I qeverisë serbe.

Gazsjellësi Nish-Dimitrovgrad do të bëhet funksional vitin e ardhshëm dhe Serbia do të jetë në gjendje të marrë nga furnizuesit e tjerë rreth 40% të sasisë totale që konsumohet.

Mihajloviç tha se Azerbajxhani dhe një terminal i gazit të lëngshëm ishin burime të mundshme alternative, ndërsa nënvizoi se një objektiv tjetër është edhe lidhja me Kroacinë dhe Rumaninë, që do ta bënte Serbinë një vend tranzit duke krijuar një rrjet rajonal të gazit.

Aktualisht, Serbia ka një marrëveshje me Gazprom për të blerë 2 miliardë metra kub gaz në vit, si dhe do të marrë me qira kapacitete shtesë në një vend depozitimi në Hungari. Sipas saj, sado i ndërlikuar të jetë dimri i ardhshëm, do të kemi sasi të mjaftueshme gazi për qytetarët dhe bizneset.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.