Sezoni turistik/ Durrësi ndriçon rrugët e plazhit. Implementon teknologjitë e reja EE LED

Pak para çeljes së sezonit turistik, Bashkia e Durrësit ka nisur një investim të ri në drejtim të përmirësimit të kushteve për turistët.

Në Agjencinë e Prokurimeve Publike është shpallur tenderi për rehabilitimin e ndriçimit të akseve rrugore në zonën e plazhit.

Në projekt përfshihen rrugët në zonën e Plepave, Rruga Venecia, Rruga Iliria, Rruga Porta e Detit, Rruga Brindisi, Rruga Leoni dhe Koja. Aktualisht këto rrugë janë pa ndriçim ose me ndriçim që ka nevojë për ndërhyrje rehabilituese dhe një numër i madh banorësh jetojnë aty prej vitesh.

Tenderi, i cili është hapur në datën 10 maj, ka një fond limit prej rreth 25 mln lekësh. Kompanitë e interesuara mund të dorëzojnë ofertat e tyre deri në datën 27 maj.

Ky projekt synon të rinovojë dhe të modernizojë të gjitha rrugët e përzgjedhura duke prezantuar teknologjitë e reja EE LED, që janë më komode dhe në të njëjtën kohë më eficente për qytetarët dhe turistët.

Gjithashtu fokusi është te promovimi i kësaj teknologjie si teknologjia më e fundit për ndriçimin e rrugëve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.