Sfida e “gjelbër” e Bankës Botërore – Çdo dollar i investuar në parandalim dhe qendrueshmëri kursen 4 dollarë

Vendet mund të bëjnë shumë pak në mënyrë individuale për të trajtuar ndryshimet klimatike, humbjen e biodiversitetit dhe pandemitë. Efektet e këtyre krizave nuk ndalojnë në kufijtë e vendeve, ndaj komuniteti global duhet t’i trajtojë këto çështje së bashku. Kjo kushton para dhe këtu hyn në lojë Banka Botërore. Ajo është gjithashtu organizata më e madhe e financimit të zhvillimit në botë dhe për këtë arsye ushtron një ndikim të rëndësishëm në lirimin e fondeve për të luftuar krizën klimatike dhe sfidat e tjera globale. Përballë këtyre, Banka Botërore duhet të përshtatë modelin e saj aktual të biznesit si dhe duhet të mbështesë vendet që të adoptojnë mënyra më të qëndrueshme të jetesës, prodhimit dhe konsumit.

Qëllimi është gjithashtu që vendet të përgatiten më mirë për rreziqet klimatike, pandemitë e ardhshme dhe kriza të tjera, sepse rritja me çdo kusht nuk është një opsion. Një mjedis i pastër, një klimë e qëndrueshme, paqja dhe shëndeti global janë të mira publike globale të nevojshme për të gjithë ne për të mbijetuar. Sigurimi ose mbrojtja e të mirave publike globale në Jugun global do të kushtojë rreth 2.4 trilion dollarë çdo vit deri në vitin 2030. Ky numër mund të tingëllojë mjaft alarmant.

Por, siç thekson Banka Botërore, kjo është një kosto e vogël në krahasim me kostot e mosveprimit të plotë, sepse sa më shpejt që komuniteti global t’i adresojë këto sfida, aq më të ulëta janë pasojat dhe kostot negative. Studimet tregojnë se çdo dollar i investuar në parandalimin dhe qëndrueshmërinë kursen katër dollarë në përgjigjen ndaj krizës në afat të gjatë. Banka Botërore mund të aksesojë fondet e nevojshme duke modifikuar strukturat dhe mënyrat e funksionimit, por veçanërisht duke përdorur më shumë kapital privat. Do të ndihmonte gjithashtu në ndryshimin e kritereve të huadhënies dhe do të ofronte, për shembull, kredi më të favorshme për të mbrojtur të mirat publike.

Investimi në burimet e rinovueshme të energjisë ia vlen, sepse ato po bëhen gjithnjë e më shumë opsioni më i lirë dhe, të paktën teorikisht, opsioni më i mirë financiar. Koncepti i grupit të vetëm të Bankës Botërore / One World Bank Group, do të thotë që të gjitha institucionet u ofrojnë vendeve huamarrëse mbështetje të koordinuar, bazuar në analiza të përbashkëta ose plotësuese.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.