Sfidat e rregullimit të tregut audioviziv – Kreu i AMA, në mbledhjen e Platformës Europiane të Autoriteteve Rregullatore

Kreu i Autoritetit të Mediave Audiovizive, njëkohësisht Presidente e Rrjetit Mesdhetar të Enteve Rregullatore, Armela Krasniqi, mori pjesë në mbledhjen e Platformës Europiane të Autoriteteve Rregullatore, me fokus sfidat aktuale të tregut mediatik.

Në fjalën e saj, Krasniqi theksoi se, akti Europian i Lirisë së Medias që pritet të aprovohet është një instrument i ri shumë i dobishëm i Bashkimit Europian për të mbrojtur pluralizmin dhe pavarësinë e medias. Ajo nënvizoi rëndësinë e transparencës së pronësisë së medias. Ndërkohë, rregullimi ligjor i Platformave të Shpërndarjes së Videove është një tjetër sfidë me të cilën entet rregullatore përballen aktualisht.

Kreu i AMA, u shpreh se institucioni që ajo drejton është gati të kontribuojë në krijimin e një hapësire të përbashkët dhe shumëpalëshe për shkëmbim e praktikave më të mira në rregullimin e platformave digjitale.

Platforma Europiane e Autoriteteve Rregullatore (EPRA) u themelua në vitin 1995 si nevojë në rritje e bashkëpunimit mes enteve europiane rregullatore. Me përvojën e saj 25 vjeçare dhe me një rrjet të fortë kontaktesh në nivel profesional, EPRA është rrjeti më i vjetër dhe më i madh i rregullatorëve të transmetimit dhe është një mjedis ideal për shkëmbimin e informacionit, rasteve dhe praktikave më të mira midis rregullatorëve të transmetimit në Evropë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.