SHBA, 202 milionë dollarë për energjinë në Kosovë – Nënshkruhet marrëveshja me Korporatën Amerikane për Sfidat e Mijëvjeçarit

Qeveria e Kosovës dhe Korporata Amerikane për Sfidat e Mijëvjeçarit kanë finalizuar në Uashington një marrëveshje “kompakt” me vlerë prej 236.7 milionë dollar, nga e cila 202 milionë dollarë janë grant nga Korporata dhe pjesa tjetër bashkëfinancim nga Kosova.

Ky program do të mundësojë stabilizimin e furnizimit me energji elektrike, integrimin e burimeve te ripërtëritshme të energjisë dhe përgatitjen e fuqisë punëtore për punësim në sektor të energjisë, me fokus të veçantë tek gratë. Përmes kësaj marrëveshje Kosova përfiton dy projekte, që njëherësh konsiderohet si investimi më i madh i Qeverisë amerikane në Kosovë. Nëpërmjet kësaj marrëveshjeje Korporata synon të ulë varfërinë në Kosovës përmes rritjes ekonomike dhe furnizimin e qendrueshëm energjetik.

“Në 49 vende që nga viti 2004 SHBA ka investuar miliona dollarë. Sot Kosova dhe MCC nënshkruajnë marrëveshjen në vlerë 202 milionë dollarë për mbështetje të energjisë. Energjia është thelbësore për zhvillim. Investimet do të jenë në energji, si krijimin e baterive akumuluese energjetike, heqja e barrierave për gratë që të jenë më të përfshira në biznes. Edhe Qeveria e Kosovës do të kontribuojë me 35 milionë dollarë. 4 nga 10 shtëpi në Kosovë, aktualisht janë duke u përballur me probleme të energjisë. SHBA është shumë krenare për partneritetin me Kosovën në këto marrëveshje,” tha Alice Albright, kryeshefe e MCC.

Marrëveshja u vlerësua edhe nga kryeministri I Kosovës, Albin Kurti, I cili u shpreh se ky do të jetë investimi më i madh dhe më inovativ i sektorit të energjisë në Kosovë deri më sot.

“Kjo marrëveshje do t’ia sjellë Kosovës 236.7 milionë dollarë grante. Pra nuk bëhet fjalë për kredi por bëhet fjalë për grantë. Jemi shumë të lumtur. Është një lajm i jashtëzakonshëm për qytetarët e Republikës sonë, por komunitetin e biznesit, për institucionet e Republikës sepse në këtë mënyrë ne po e rrisim edhe përqendrimin tonë në energji, por në të njëjtën kohë edhe do ta përforcojmë ekonominë tonë, e cila me rritjen që ka dhe eksportet e shtuara natyrisht se do të ketë nevojë për më shumë energji. E meqenëse edhe në bazë të strategjisë sonë për energji 2022 – 2031 do të përqendrohemi tek burimet e ripërtritshme, kemi nevojë për bateritë akomuluese dhe pikërisht këto do të kemi mundësi t’i realizojmë përmes këtij granti”, tha Kurti.

Investimet e Programit Kompakt do të jenë në pronësi të Republikës së Kosovës, dhe shënojnë një nga bashkëpunimet më të rëndësishme zhvillimore të vendit me Shtetet e Bashkuara të Amerikës.

Dorina Murtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.