SHBA-BE, në mbrojtje të tregjeve globale të energjisë – Zotimi për eleminimin e çdo përpjekjeje për destabilizimin e tyre

Shtetet e Bashkuara të Amerikës dhe Bashkimi Europian u zotuan të përballen me çdo përpjekje për të destabilizuar tregjet globale të energjisë, pas takimit në Bruksel ku u diskutua për ndikimin e pushtimit rus të Ukrainës.

Bashkëpunimi për energjinë midis Shteteve të Bashkuara dhe Bashkimit Europian është intensifikuar që kur Rusia reduktoi furnizimet me gaz në Europë pas pushtimit të Ukrainës vitin e kaluar. Kjo e zhyti kontinentin në një krizë si pasojë e furnizimit të kufizuar me energji dhe cmimet e larta që shënuan rekorde.

Politikanët europianë kanë akuzuar Rusinë për përdorimin si armë të furnizimeve të saj energjetike dhe SHBA-ja dhe BE-ja kanë vendosur sanksione ndaj mallrave ruse duke përfshirë qymyrin dhe naftën, si dhe një kufi të çmimit, të fiksuar nga G7, për naftën ruse në det.

Europa deri më tani ka arritur të zëvendësojë pjesën më të madhe të gazit që merrte më parë nga Moska, e ndihmuar nga një rritje e importeve nga furnizues të tjerë, një ndërtim i shpejtë i energjisë së rinovueshme, moti i ngrohtë i dimrit dhe politikat e BE-së që frenuan përdorimin e përgjithshëm të gazit.

SHBA dërgoi 56 miliardë metra kub gaz natyror të lëngshëm në BE në vitin 2022, më shumë se dyfishi i dërgesave të vitit të kaluar, duke e bërë Eiropën destinacionin kryesor për furnizimet e SHBA-së me gaz natyror të lëngshëm.

Deklarata SHBA-BE bënte të qartë se të dy palët gjithashtu do të intensifikojnë bashkëpunimin për të reduktuar varësinë nga Rusia për karburantin dhe shërbimet bërthamore dhe do të mbajnë një takim të përbashkët këtë vit për të promovuar teknologjitë e avancuara, si reaktorët e vegjël modularë. BE-ja nuk ka sanksionuar importet e gazit rus ose karburantit bërthamor, tek i cili mbështeten disa nga anëtarët e bllokut 27-anëtarësh.

Rusia furnizoi 20% të uraniumit të termocentraleve bërthamore të BE-së – karburanti kryesor për ta – në vitin 2021, dhe 31% të shërbimeve të tyre të pasurimit të uraniumit, sipas Agjencisë së Furnizimit Euratom. Shtetet e Bashkuara të Amerikës importuan 35% të uraniumit të tyre nga Kazakistani në të njëjtin vit, me 15% nga Kanadaja, 14% nga Australia dhe 14% nga Rusia.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.