Shefi i ChatGPT thirrje Kongresit Amerikan: Rregullimi i inteligjencës artificiale është ‘vendimtar’!

Kreu i kompanisë së inteligjencës artificiale që zhvilloi ChatGPT i tha Kongresit të SHBA se ndërsa inteligjenca artificiale mund të jetë e dobishme për njerëzimin, ajo duhet të rregullohet. Ai renditi aplikimet e dobishme të teknologjisë, nga mjekësia deri te luftimi i krizës klimatike. Por ai tha se ndërhyrja e qeverive të botës ishte e nevojshme për të siguruar që këto mjete të zhvillohen në një mënyrë që mbron dhe respekton të drejtat dhe liritë e qytetarëve.

Ai propozoi formimin e një agjencie amerikane ose globale që do të licenconte sistemet më të fuqishme të inteligjencës artificiale dhe do të kishte autoritetin për të “hequr atë licencë dhe për të siguruar përputhjen me standardet e sigurisë”.

Start-up-i i Altman me bazë në San Francisko tërhoqi vëmendjen globale në nëntor të vitit të kaluar kur publikoi ChatGPT. Mjeti falas i chatbot-it mund të shkruajë ese ose një poezi, të planifikojë një itinerar pushimesh ose të zgjidhë një kod kompjuteri me përgjigje bindëse të ngjashme me njeriun.

Dëshmia e tij vjen mes shqetësimeve në rritje në Shtetet e Bashkuara dhe gjetkë se AI do të ketë efekte të papritura në shoqëri. Ligjvënësit amerikanë përmendën rreziqe të tilla si humbja e vendeve të punës ose përdorimi i mjeteve të krijimit të përmbajtjes për të gjeneruar informacion të rremë nga aktorë të huaj.

Nuk ka asnjë shenjë të menjëhershme se Kongresi do të hartojë rregulla të reja gjithëpërfshirëse të AI, siç po bëjnë ligjvënësit europianë. Por agjencitë amerikane kanë premtuar se do të godasin produktet e dëmshme të AI që shkelin ligjet ekzistuese të të drejtave civile dhe mbrojtjen e konsumatorëve.

Në fillim të këtij muaji, qeveria amerikane njoftoi se do të investojë 140 milionë dollarë për të krijuar shtatë institute të reja kërkimore të inteligjencës artificiale që do të nxisin inovacionin e përgjegjshëm dhe do të sigurojnë që përparimet në teknologji t’i shërbejnë të mirës së përbashkët.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.