Shifrat ‘alarmante’ të pemëve globale të humbura nga zjarret!

Të dhënat nga Global Forest Watch sugjerojnë se në të gjithë globin, sasia e mbulesës së pemëve që digjen është pothuajse dyfishuar në 20 vitet e fundit. Ndryshimet klimatike janë një faktor kyç në rritje pasi çojnë në temperatura më të larta dhe kushte më të thata.

Nga 9 milionë hektarë pemë të konsumuara nga zjarri në vitin 2021, mbi pesë milionë ishin në Rusi. Të dhënat e reja i lejojnë studiuesit të bëjnë dallimin midis pemëve të humbura nga zjarret dhe atyre të shkatërruara për bujqësi, prerje ose djegie të qëllimshme.

Në vitin 2021, viti i dytë më i keq për zjarret në rekord, një zonë me madhësinë e Portugalisë humbi.

Ndikimet e humbjeve të lidhura me zjarret po ndihen kryesisht në pyjet në vendet më veriore si Kanadaja dhe Rusia. Ndërsa zjarri është një pjesë e natyrshme e mënyrës se si këto pyje kanë funksionuar prej kohësh, shkalla e shkatërrimit e parë në Rusi në vitin 2021 ishte e paprecedentë.

Nga 9.3 milionë hektarë të djegur globalisht, Rusia përbënte më shumë se gjysmën. Pemët dhe tokat ruajnë dioksidin e karbonit – një nga gazrat kyç që ngroh atmosferën tonë – dhe ekspertët thonë se ato janë vendimtare në trajtimin e ndryshimeve klimatike.

Ndërsa shumë nga pemët që digjen do të rriten përsëri gjatë një periudhe prej 100 vjetësh ose më shumë, ka ndikime të rëndësishme të lidhura me këto humbje në biodiversitetin, në cilësinë e ujit dhe erozionin e tokës.

OKB thotë se perspektiva për zjarret në pyje në dekadat e ardhshme është e zymtë. Pritet një rritje prej 50% e zjarreve ekstreme deri në fund të këtij shekulli. Për të adresuar këtë problem, shkencëtarët thonë se shkurtimet e shpejta dhe të thella në emetimet globale të karbonit janë thelbësore.

Udhëheqësit globalë në konferencën e ndryshimeve klimatike COP26 në Glasgow vitin e kaluar u zotuan t’i japin fund shpyllëzimit, por premtimi duhet të respektohet nëse do të sjellë ndryshim. Më shumë përqendrim në parandalimin e zjarreve në pyje, në vend të luftimit të tyre, nevojitet ende. Rreth 50% e buxheteve kombëtare të zjarrit janë për t’iu përgjigjur zjarreve dhe më pak se 1% është me të vërtetë për përgatitjen dhe planifikimin.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.