Shqipëria në ‘black-out’. Anashkalohet ligji për “Gjendjen e Krizës Kibernetike’ Çfarë parashikon ligji i 2017. Roli inekzistent i APCESK

Shqipëria ndodhet në një krizë të vërtetë kibernetike si pasojë e mbylljes ë portalit unik qeveritar e-albania.

Por edhe pse është në krizë, qeveria shqiptare ende nuk ka shpallur zyrtarisht “Gjendjen e Krizës Kibernetike”, sikurse e parashikon ligji.

Po ashtu, ligji parashikon edhe aktivizimin e një institucioni, që duket se në këtë rast është lënë në harresë

 

Një ‘blackout total’ në shërbimet online! Kjo është ajo që po ndodh në Shqipëri si pasojë e mbylljes totale të portalit E-Albania, ku qeveria shqiptare ka transferuar të gjitha shërbimet publike që prej datës 1 maj të këtij viti.

Pasojat janë ndjerë menjëherë te biznesi, shkollat e deri të zyrat konsullore që kanë pezulluar gjithçka.

Nga ana tjetër, edhe administrata publike është përballur me ndërprerjen e shërbimit të internetit, duke frenuar edhe punën e saj.

Qeveria shqiptare ka reaguar duke informuar se ekspertë vendas dhe të huaj po punojnë për rikthimin e shërbimeve ndërsa situata vijon të jetë emergjent.

Qeveria shqiptare e ka cilësuar si një sulm që cënon sigurinë kombëtare, por në fakt nuk ka zgjedhur rrugën që parashikon ligji për sigurinë kibernetike.

Ligji përcakton në mënyrë të qartë se cilët janë mekanizmat që aktivizohen në rast të një gjendje krize kibernetike.

Në nenin 19 të ligjit për sigurinë kibernetike të vitit 2017 përcaktohet se “gjendja e krizës kibernetike është situata, gjatë së cilës siguria e informacionit në  sistemet e informacionit ose siguria e rrjeteve të komunikimeve elektronike është seriozisht e  rrezikuar, duke vënë në rrezik interesin publik të Republikës së Shqipërisë”.

Shqipëria në fakt ndodhet në këto kushte, fakt i pranuar edhe nga vetë qeveria, por ende nuk është zbatuar pika 2 e këtij neni, që parashikon shpalljen, më vendim të Këshillit të Ministrave të ‘Gjendjes së Krizës Kibernetike”.

Ligji parashikon se “Gjendja e krizës kibernetike” shpallet për një periudhë kohore deri në shtatë ditë.

Në këtë krizë kibernetike të Shqipërisë, qeveria shqiptare ka njoftuar zyrtarisht se janë angazhuar për zgjidhjen e saj ekspertë nga Agjencia Kombëtare e Shoqërisë së Informacionit, që po bashkëpunon ngushtësisht me partnerët në Microsoft dhe ekspertët e “Jones Group International”.

Në ekipin për zgjidhjen e kësaj krize, nuk përmendet Autoriteti Kombëtar për Certifikimin Elektronik dhe për Sigurinë Kibernetike, ose AKCESK.

Ligji për sigurinë kibernetike parashikon se për raste të tilla, institucioni përgjegjës duhet të jetë Autoriteti Kombëtar për Certifikimin Elektronik dhe për Sigurinë Kibernetike.

Në këto vite, ky institucion nuk ka marrë mbështetjen e nevojshme për t’u fuqizuar, as nga AKSHI e as nga instituconet e tjera, duke bërë që Shqipëria të mos ketë një institucion të tijin që i përgjigjet në terren krizave të tilla, dhe jo vetëm në letër, sikurse parashikohet në ligjin në fuqi por të ‘harruar’ të 2017.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.