Shqiptarët mund të investojnë në fondet e BE – Mete: Kjo sipërmarrje, shenjë besimi për tregjet financiare në vend

Qytetarët shqiptarë tashmë do të kenë një mundësi më shumë për të investuar në fondet e licencuara të Bashkimit Europian. Ministri i Financave dhe Ekonomisë, Ervin Mete, mori pjesë në ceremoninë e prezantimit të fondit të investimeve të Eurizon Capital në Shqipëri. Ky fond investimi është në pronësi të grupit Intesa Sanpaolo dhe ka marrë autorizimin e Autoritetit të Mbikëqyrjes Financiare për të operuar në Shqipëri, nëpërmjet shpërndarjes së nënfondeve të veta.

Në fjalën e tij, ministri Mete vlerësoi nismën për operimin në vendin tonë të fondeve të investimit të Eurizon Capital, si një mundësi e re për qytetarët shqiptarë për të ndërmarrë investime në fondet e licencuara në Bashkimin Europian. Sipas tij, kjo është një mundësi e re për investitorët shqiptarë për të aksesuar drejtpërdrejt tregun europian të menaxhimit të aseteve dhe fondeve të investimeve, siç është edhe një hap drejt integrimit të tregut tonë financiar në tregun e BE-së.

Ministri theksoi më tej se kjo sipërmarrje është një shenjë besimi për tregjet financiare në vend dhe mjedisin e biznesit në përgjithësi, ashtu edhe e thellimit të bashkëpunimit ekonomik mes Shqipërisë dhe Italisë.

Gjatë periudhës janar-qershor 2023, në tregun e fondeve të investimeve ushtruan aktivitetin e tyre 13 fonde investimi me një vlerë neto të aseteve prej rreth 43.30 miliardë lekë me një rritje 4.42% krahasuar me 31 dhjetorin 2022.

Ky treg dominohet kryesisht nga investimet në Obligacione Qeveritare, të cilat përbëjnë 72.71% të aseteve të fondeve. Numri i anëtarëve që kanë investuar në fondet e investimit deri më 30 qershor 2023 është 30,077 me një rritje prej 3.91% krahasuar me 31 dhjetorin 2022.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.