Si ndahen bizneset sipas formës së regjistrimit? – Në tre muajt e parë të vitit, 3.915 subjekte janë “Person Fizik”

Bizneset në vendin tonë regjistrohen në disa forma të ndryshme ligjore. Kështu duke filluar biznese si person fizik, si shoqëri me përgjegjësi të kufizuar, shoqëri aksionere etj.

Referuar të dhënave të Open Data Albania, në muajt e parë të këtij viti, biznese sipas formës ligjore janë regjistruar 5322 gjithsej. Por çfarë thonë shifrat për secilën kategori?.

Në po të njëjta të dhëna, raportohet se bizneset e regjistruar si Person Fizik kryesojnë për vitin 2024, ku janë regjistruar 3915 gjithsej në të gjithë Shqipërinë. Person Fizik quhet një individ që kërkon të ushtrojë një aktivitet tregtar të pavarur dhe është  i vetëpunësuar, i vetëm dhe/ose me punëmarrës anëtarë të papaguar të familjes dhe persona të tjerë. Personi fizik regjistrohet si i tillë në Qendrën Kombëtare të Biznesit.

Nëse një Person Fizik ka një xhiro vjetore të biznesit nga 0 deri në 2 milionë Lekë ai nuk është subjekt i TVSH dhe Tatimit mbi fitimit, por ka detyrime për të deklaruar dhe paguar Kontributet e Sigurimeve Shoqërore dhe Shëndetësore dhe Tatimin mbi të Ardhurat Personale; Tatimin e Thjeshtuar mbi Fitimin; dhe Tatimin në Burim.

Sipas kalkulimeve të Open Data Albania, të dytët për nga renditja e shifrave janë ato biznese të regjistruar si shoqëri me përgjegjësi të kufizuar me 1380 gjithsej. Shoqëria me përgjegjësi të kufizuar është një shoqëri tregtare, e themeluar nga persona fizikë ose juridikë, të cilët nuk përgjigjen për detyrimet e shoqërisë tregtare dhe mbulojnë personalisht humbjet e shoqërisë deri në pjesën e pashlyer të kontributeve të nënshkruara. Kontributet e ortakëve përbëjnë kapitalin e regjistruar të shoqërisë me përgjegjësi të kufizuar.

Secili ortak gëzon kuotën e tij në shoqëri, në përpjesëtim me kontributin që ka dhënë në kapital. Kapitali i regjistruar i shoqërisë ndahet ndërmjet ortakëve në kuota, sipas këtij raporti. Ndërkohë, referuar të dhënave të Open Data Albania, si shoqëri e thjeshtë janë regjistruar 13 biznese.

Së fundmi janë shtuar dhe bizneset që operojnë nga investitorë të huaj, por sipas formës ligjore si degë e shoqërisë së huaj janë regjitruar 6 të tillë për muajt e parë të këtij viti. Ndërkohë nga 3 përkatësisht janë regjistruar si Shoqëri e Bashkëpunimit bujqësore si dhe Shoqëri Aksionere.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.