Si vapa ekstreme po godet njëherësh tre ekonomitë më të mëdha në botë!

Vlerësimi se sa katastrofik do të jetë ndryshimi i klimës për ekonominë globale është dëshmuar historikisht sfidues. Por këtë verë, është gjithnjë e më e dukshme se sa shpejt mund të grumbullohen kostot. Kushtet ekstreme të të nxehtit dhe thatësirës po godasin Shtetet e Bashkuara, Europën dhe Kinën, duke komplikuar problemet për punëtorët dhe bizneset në një kohë kur rritja ekonomike tashmë po ngadalësohet ndjeshëm dhe po shton presionin në rritje mbi çmimet.

Në provincën Sichuan të Kinës, të gjitha fabrikat janë urdhëruar të mbyllen për gjashtë ditë për të ruajtur energjinë. Anijet që transportojnë qymyr dhe kimikate po përpiqen të bëjnë udhëtimet e tyre të zakonshme përgjatë lumit Rhine të Gjermanisë. Dhe njerëzve që jetojnë në Bregun Perëndimor të Amerikës u është kërkuar të përdorin më pak energji elektrike ndërsa temperaturat rriten.

Këto ngjarje “kanë kapacitetin të jenë mjaft domethënëse për rajonet e veçanta që janë prekur”, tha Ben May, drejtor i kërkimit global makro në Oxford Economics. Shkalla e dhimbjes mund të varet nga sa zgjasin valët e të nxehtit dhe mungesa e shiut. Por në vende si Gjermania, ekspertët paralajmërojnë se ka pak lehtësim në horizont dhe kompanitë po përgatiten për më të keqen.

Nuk është vetëm Rhine. Në të gjithë botën, lumenjtë që mbështesin rritjen globale, Yangtze, Danubi dhe Kolorado po thahen, duke penguar lëvizjen e mallrave, duke ngatërruar sistemet e ujitjes dhe duke e bërë më të vështirë për termocentralet dhe fabrikat të qëndrojnë të freskëta. Në të njëjtën kohë, nxehtësia përvëluese po pengon rrjetet e transportit, tensionon furnizimin me energji elektrike dhe dëmton produktivitetin e punëtorëve.

Kina po përballet me valën e saj më të egër të të nxehtit në gjashtë dekada, me temperatura që kalojnë 40 gradë Celsius në dhjetëra qytete. Disa pjesë të Kalifornisë mund të shohin temperatura deri në 42 gradë Celcius këtë javë. Në fillim të kësaj vere, temperaturat arritën 40 gradë Celsius në Mbretërinë e Bashkuar për herë të parë ndonjëherë. 63% e tokës në Bashkimin Europian dhe në Mbretërinë e Bashkuar, një zonë pothuajse e njëjtë me madhësinë e Indisë, tani është nën paralajmërime ose alarme për thatësirën.

Ekonomia globale ishte tashmë nën presion. Europa është në rrezik të lartë të një recesioni pasi çmimet e energjisë rriten, të nxitura nga pushtimi rus i Ukrainës. Inflacioni i lartë dhe rritja agresive e normave të interesit nga Rezerva Federale rrezikojnë rritjen në Shtetet e Bashkuara. Kina po përballet me pasojat e bllokimeve të ashpra të koronavirusit dhe një krize të pasurive të paluajtshme.

Moti ekstrem mund të përkeqësojë “pikat e ngushta ekzistuese” përgjatë zinxhirëve të furnizimit, një arsye kryesore që inflacioni ka qenë i vështirë për t’u ulur. Si pasojë, parashikimet për ekonominë e Kinës këtë vit tashmë janë duke u ulur. Analistët në Nomura ulën parashikimin e tyre për vitin 2022 për rritjen e PBB-së në 2.8% të enjten shumë më poshtë objektivit të qeverisë prej 5.5%, ndërsa Goldman Sachs e shkurtoi parashikimin e saj në 3%.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.