Siguria nga bombulat, nisin inspektimet në shkolla e çerdhe – Kreu i ISHTI, Zaimi: Aksioni do të vijojë në të gjithë Shqipërinë

Në të njejtën kohë me inspektimet e strukturave të hotelerisë përgjatë vijës bregdetare, sa i takon sigurisë së bombulave dhe sistemeve elektrike, Inspektoriati Shtetëror Teknik dhe Industrial ka nisur aksionin edhe në institucionet arsimore publike dhe private.

Kreu i ISHTI-it Sokol Zaimi tha se faza e parë e inspektimeve ka nisur në tre bashki, konkretisht në Elbasan, Tiranë dhe Durrës, ndërsa synohet shtrirja në të gjitha shkollat e vendit, duke përfshirë edhe çerdhet.

Prej disa muajsh, trupa e inspektorëve të Inspektoriatit Shtetëror Teknik dhe Industrial është në terren për të kontrolluar zbatimin e kushteve të sigurisë, që lidhen me sistemet elektrike si edhe me instalimin dhe përdorimin e bombulave të gazit. Gjithsej janë 650 subjekte që do të jenë “në lupën” e inspektorëve.

Nga studio e emsionit “Box to Box”, Zaimi vuri në dukje, se deri më tani kanë përfunduar kontrollet në 42 për qind prej këtyre subjekteve.

Aksioni, siç është vënë në dukje më herët edhe zv.Kryeministrja njëherazi Ministrja e Infrastrukturës dhe Energjisë Belinda Balluku do të finalizohet brenda këtij muaji, duke i paraprirë edhe sezonit veror.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.