Sigurimi motorik, 6.6 mld lekë prime në 6-mujorin e parë – Rritet numri i kontratave. Shkak, shifrat e larta të aksidenteve

Ledina Elezi/SCAN

 

Më shumë qytetarë po sigurojnë automjetet e tyre në rast aksidenti, fakt që vërehet në rritjen e numrit të kontratave të sigurimit motorik dhe të primeve të shkruara bruto. Sipas informacioneve të publikuara nga Autoriteti i Mbikëqyrjes Financiare, primet e sigurimit motorik arritën rreth 6,6 miliardë lekë në gjashtëmujorin e parë të vitit, ose 9.49% më shumë se në periudhën janar – qershor 2023.

Në një hark kohor prej 5 vitesh, të ardhurat nga sigurimi i mjeteve motorike kanë pësuar një rritje të konsiderueshme. Që prej 2020-ës, primet e sigurimit motorik janë rritur çdo vit me 7% deri në 12%.

Për sa i përket produktit MTPL e brendshme, i cili i referohet sigurimit të mjetit motorik për përgjegjësinë ndaj palëve të treta në rastet kur i siguruari përfshihet në një aksident dhe është përgjegjës për dëme materiale, pasurore apo shëndetësore, në periudhën janar – qershor 2024 ka pasur një rritje prej 11.15% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 10.77% krahasuar me të njëjtën periudhë të një viti më parë.

Ndërkohë, pagesat e dëmeve në gjashtëmujorin e parë të vitit u rritën me 24.53% llogaritur me janar – qershor 2023. Pjesa më e madhe e dëmeve të paguara bruto i përket pikërisht sigurimit motorik me rreth 2,9 miliardë lekë, ose 70.56% të totalit të dëmeve të paguara bruto, duke pësuar edhe një rritje me përafërsisht 21% krahasuar me të njëjtën periudhë të një viti më parë.

Rritjes së anëtarëve në sigurimin motorik dhe të pagesës së dëmeve, i përgjigjet gjithashtu edhe një bilanc më i lartë aksidentesh rrugore. Referuar të dhënave zyrtare nga INSTAT, në 5 muajt e parë të këtij viti numërohen gjithsej 626 aksidente, rreth 199 më shumë se në periudhën janar-maj 2023, ku vetëm në muajin maj u regjistruan 126 aksidente rrugore.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.