Subvencionet, pas 15 ditësh nis verifikimi – Jaupllari: Dokumentacioni, fermerët të jenë të kujdesshëm gjatë dorëzimit

Pas mbylljes së aplikimeve për skemën kombëtare të mbështetjes në bujqësi për vitin 2024, nis procesi i vlerësimit administrativ, për t’i hapur rrugë financimit. Në një intervistë për SCAN TV, zëvendësminitri i bujqësisë Arjan Jaupllari ka thënë se pas 15 ditësh nis faza e verifikimit. Për këtë, ai i kërkuar fermerëve që të jenë të kujdeshëm gjatë dorëzimit të dokumentacionit.

“Faza e dytë fillon pas 15 ditësh dhe fermerët duhet të kenë kujdes, pasi aty kanë një numër telefoni, adresën e tyre dhe do t’ju bjerë telefoni, ndaj duhet të jenë vigjilentë për të çuar dokumentacionin në kohë për të vijuar më pas me fazën e tretë që është kalkulimi i dokumentacionit dhe vendosjes së radhës së përfituesve, të cilat i përzgjedh sistemi dhe pastaj nis faza e katërt që është verifikimi në terren dhe nis të bëhet disbursimi”- thotë zëvendësministri i bujqësisë.

Sipas Jaupllarit, interes të shtuar ka patur për masat 1-7 me 15 mijë aplikantë, ndërkohë për naftën janë 54.500 aplikime.

“Në total janë 69852 aplikime që ne e kishim parashikuar. Aplikimet më të mëdha janë përqëndruar në masat 1-7, që janë rreth 15 mijë aplikantë, pastaj nafta që zë pjesën më të madhe prej 54.500 aplikime. Në grup, si risi për këtë vit, numri ka shkuar në 321 aplikime, ku pjesën më të madhe e zë grup-fermerët për serat, ku limiti për të përfituar mbështetje ishte 1 hektarë. Për naftën ka grupime të mëdha, ku janë 8 grupime për mbi 10 hektarë ku do të marrin 100% mbështetje dhe jo në masën 80%”- thotë Jupllari.

Gjatë fazës së parë aplikuan 321 grupe fermerësh dhe 21 Shoqëri të Bashkëpunimit Bujqësor, duke synuar zhvillimin e mëtejshëm të aktivitetit bujqësor dhe blegtoral dhe përfituar nga mbështetja e qeverisë shqiptare. Por Jaupllari ka thënë se nuk janë përjashtuar dhe aplikimet e fermerëve që aplikuan si në bujqësi edhe në blegtori.

“Në skemën e këtij viti u hoqën disa kufizime. Mund të përfitohet 2 herë si për blegtorinë dhe për naftën që mund ta ketë në shërbim të këtij sektori” – ka shtuar Jaupllari

Qarku me numrin më të lartë të aplikimeve është ai i Fierit, pasuar nga qarku i Korçës.

Alida Lula/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.