Suedia e Finlanda në NATO, Shqipëria nis ratifikimin – Qeveria dërgon në Kuvend projektligjin: konsolidim sigurisë në Atlantikun e Veriut

Ndërsa llogaritet se ratifikimi i traktatit për anëtarësim të Suedisë e Finlandës në parlamentet e 30 shteteve anëtare të NATO-s pritet të marrë deri një vit kohë, Qeveria Shqiptare ka dërguar tashmë në Kuvend dy projektligjet përkatëse.  Nënshkrimi i protokolleve dhe ratifikimi nga parlamentet e 30 vendeve anëtare, nga pikëpamja ligjore, do të mundësojë pranimin e dy vendeve në Traktatin e Atlantikut të Veriut duke e ccuar numrin e anëtarëve në 32

Shqipëria bëhet ndër vendet e para që kanë nxituar të fusin në procedurë zyrtarisht ratifikimin e protokollit të Traktatit që do të bëjë të mundur anëtarësimin e Suedisë e Finlandës në NATO. Procesi i pranimit pritet të zgjasë disa javë, ndërsa ratifikimi në parlamentet e 30 shteteve anëtare, deri në një vit, në një kohë që Qeveria Shqiptare ka dërguar tashmë në Kuvend dy projektligjet për ratifikimin e protokolleve.

Nga pikëpamja ligjore, protokollet e anëtarësimit të vendeve të reja anëtare të NATO-s janë në fakt shtesa juridike (adendum-e) të Traktatit të Atlantikut të Veriut, i njohur ndryshe edhe si Traktati i Uashingtonit, i nënshkruar në kryeqytetin e SHBA-ve më 4 prill 1949. Nënshkrimi i këtij protokolli dhe ratifikimi nga parlamentet e 30 vendeve anëtare të NATO-s, si dhe Parlamenti i Republikës së Mbretërisë së Suedisë, nga pikëpamja ligjore, do të mundësojë pranimin e dy vendeve në Traktatin e Atlantikut të Veriut duke e ccuar numrin e anëtarëve në 32.

Në relacionin shoqërues theksohet se me nënshkrimin e këtij protokolli, vendet anëtare të NATO-s konfirmojnë bindjen e tyre se anëtarësimi i Mbretërisë së Suedisë dhe Finlandës në NATO i shërben konsolidimit të mëtejshëm të sigurisë në hapësirën e Atlantikut të Veriut.

Më 18 maj 2022, Finlanda dhe Suedia dorëzuan njëkohësisht në selinë e Aleancës në Bruksel letrat e tyre zyrtare të aplikimit për t’u anëtarësuar në NATO. Pas dakordësimit të plotë të vendeve aleate lidhur me këtë aplikim në kuadër të Samitit të NATO-s në Madrid (29-30 qershor 2022) dhe vendimit të tyre historik për të ftuar Finlandën dhe Suedinë të bëhen anëtare të NATO-s, protokollet përkatëse të anëtarësimit për Suedinë dhe Finlandën u nënshkruan më 5 korrik 2022 nga përfaqësuesit e përhershëm të vendeve të NATO-s në Këshillin e Atlantikut të Veriut (NAC) dhe me përmbushjen e procedurave të brendshme ligjore nga ana e shteteve anëtare, këto dy shtete bëhen anëtare me të drejta të plota në NATO.

Vendimi i dy shteteve nordike që prej shumë vitesh kishin zgjedhur të ishin neutrale, u nxit nga shtimi i shqetësimeve mbi sigurinë, për shkak të pushtimit të paprovokuar rus të Ukrainës, që vijon prej datës 24 shkurt, ndërkohë që kaloi edhe një sprovë të vështirë me kapërcimin e vetos së vendosur fillimisht nga Turqia.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.