Të gjithë duan litiumin e Bolivisë – Rusia dhe Kina në një garë “kokë më kokë”

Moska po bën hapa të shpejtë në kërkimin e lëndëve të para kritike. Duke tërhequr Bolivinë, Rusia, ashtu si Kina, ka fituar akses në një nga rezervat më të mëdha të litiumit në botë. Gjermania, ndërkohë, ka mbetur prapa.

Një kontratë e madhe për të drejtat e lëndës së parë ka ardhur pikërisht në kohën e duhur për t’u realizuar në terren. Kontrata është me të vërtetë mbresëlënëse dhe shpresa është se ajo mund të ndihmojë në zgjidhjen e krizës së vazhdueshme ekonomike të Bolivisë në afat të mesëm.

Sipas informacioneve zyrtare, ‘Uranium One Group’ i Rusisë planifikon të investojë rreth 430 milionë dollarë në një projekt pilot për prodhimin e litiumit në vendin e Amerikës së Jugut. Gjeologët supozojnë se Bolivia ka potencialin për të nxjerrë 23 milionë tonë litium. Kjo do ta bënte atë vendin me rezervat më të mëdha në botë, një fakt i rëndësishëm kur merret parasysh se sa i rëndësishëm është metali për prodhimin e baterive për gjëra të tilla si automjetet elektrike.

Për Bolivinë, marrëveshja është më shumë se një kontratë minerare. Pas vitesh grindjesh politike – ku Morales dhe Arce luajtën secili rolin e tyre – vendi po përpiqet të prezantohet si një partner i besueshëm.

Në fazën e parë, synohet të prodhohen 1000 ton karbonat litium në vit, në fazën e dytë deri në 8000 ton dhe 5000 ton të tjerë në fazën e tretë. Fokusi do të jetë në prodhimin që është sa më miqësor me mjedisin.

Kina gjithashtu ka mundur ‘të fusë këmbën’ në vendin me rezervat më të mëdha të litiumit në botë. Nën udhëheqjen e grupit kinez ‘Contemporary Amperex Technology, CATL’, partnerët kinezë duan të investojnë një total prej 1.4 miliardë dollarësh në ndërtimin e impianteve të nxjerrjes së litiumit.

Presidenti Arce, megjithatë, ka lënë derën e hapur për partnerët jashtë Rusisë dhe Kinës. Ai u shpreh se vizitat tona në Bashkimin Europian, Brazil dhe vendet e BRICS kanë treguar qartë se ka një interes të madh për litiumin e vendit.

Litiumi është i nevojshëm për të ndërtuar bateri për automjetet elektrike, dhe për këtë arsye metali është i një rëndësie strategjike për transformimin nga karburantet fosile për makinat dhe drejt automjeteve me energji elektrike.

Pesë vjet më parë, Gjermania konsiderohej kombi që kishte avantazhin më të madh në Bolivi. Një sipërmarrje e përbashkët midis Berlinit dhe La Paz-it supozohej të ishte sinjali fillestar për prodhimin e litiumit dhe shpresat ishin të mëdha në Gjermani dhe industrinë e saj të rëndësishme të prodhimit të makinave. Por më pas ndodhën trazirat e brendshme politike në Bolivi. Projekti i sipërmarrjes së përbashkët u bë një çështje polarizuese e fushatës zgjedhore dhe një instrument i një lufte më të gjerë të brendshme për pushtet.

Projekti ka ‘vdekur’ që atëherë, dhe Gjermania aktualisht po kërkon nga Argjentina dhe Kili, të cilat gjithashtu kanë depozita të mëdha litiumi.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.