Të licencuarit e energjisë nuk paguajnë detyrimet – Enti Rregullator nis procedurat për heqjen e 21 licencave

Enti Rregullator i Energjisë ka nisur procedurat për heqjen e licencave ndaj subjekteve që nuk kanë likujduar pagesat rregullatore ndaj këtij institucioni. Sipas legjislacionit të fuqi, kjo është masa më rëndë në rast të shkeljes së këtij detyrimi, ndërkohë që vendimet që prekin të paktën 21 licenca, erdhën pasi nuk pati asnjë reagim nga ana e tyre, edhe pas njoftimeve për shkeljen e këtij detyrimi.

Përpara se të arrihet në penalizimet me gjobë legjislacioni në fuqi përcakton ndëshkimin me gjobë deri në 3 për qind të të ardhurave të vitit paraardhës të të licencuarit. Po ashtu, ligji i jep të drejtë ERE-es të aplikojë një kamatëvonesë mbi vlerën e pagesës rregullatore, në masën e 0.2 % të xhiros ditore për çdo ditë vonesë në pagesën e saj.

Por, ndonëse Enti ka proceduar me vendosjen e gjobave, subjektet nuk kanë reaguar, duke çuar, te heqja e licencës si masa më rëndë në rast të mos likujdimit të pagesave rregullatore. Gjithsesi, ky nuk është hapi përfundimtar për revokimin, pasi eksperienca e viteve të kaluar ka treguar se pas nisjes së procedurave nga ERE, subjektet kanë nisur likujdimin e detyrimeve, çka ka sjellë “faljen” nga ana e Entit. Për vitin 2023 u parashikua rritje e të ardhurave për ERE, për shkak të rritjes së fitimin të kompanive që operojnë në tregun e energjisë elektirke gjatë vitit 2022.

Ky dikaster synon të mbledhë rreth 326.4 mln lekë nga pagesat rregullatore për vitin 2023 nga subjektet e licencuar në sektorin e energjisë elektrike dhe gazit natyror. Ndërkohë që, në raport me një vit më parë janë mbi 118 mln lekë të ardhura shtesë, duke qenë se vitin që shkoi kjo vlerë arrinte në 208 mln lekë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.