“Tenderë, me vetëm 1 kompani që shpallet fituese” – Shkelje edhe me kriteret, s’ndryshohen pavarësisht kërkesës nga APP

Probleme në hartimin dhe argumentimin e dokumenteve të tenderit, si dhe shpallje fituesish në gara tenderuese me vetëm 1 kompani pjesëmarrëse”. Këto janë disa prej problemeve të konstatuar nga Agjencia e Prokurimit Publik gjatë verifikimit të zbatimit të ligjshmërisë për procedura prokurimi, të zhvilluara gjatë viteve 2020-2021, duke risjellë edhe njëherë në vëmendje shpërndarjen e parave publike për punë, mallra apo shërbime përmes garave me fitues të paracaktuar.

Verifikimi u krye për 3 lloje procedurash e më konkretisht “E hapur”, “Kërkesë për propozim” dhe “E hapur e thjeshtuar”, ndërsa u përfshinë kryesisht tenderë, për të cilët autoritetet kontraktore nuk kanë reaguar ndaj rekomandimeve të dhëna nga APP, gjatë fazës së publikimit të dokumenteve të tenderit.  Madje, sipas APP-së në disa procedura të verifikuara, rezulton se institucionet nuk kanë marrë në konsideratë rekomandimet e bëra për rishikimin e kritereve të tenderit, duke zhvilluar tenderët për kritere problematike.

Ndërkaq, nisur shkeljet dhe problemet e konstatuara, përmes një shkrese me datë 14 korrik, APP ka rikujtuar procedurat që duhet të ndiqen, si gjatë hartimit të kritereve të tenderit, ashtu edhe gjatë përzgjedhjes së kompanive fituese. Më konkretisht, për rastet kur përcaktohen vlera fikse për të dhëna teknike, duhet të argumentohet përse është përcaktuar kjo vlerë, pasi përcaktimi I paargumentuar i përmasave në vlera fikse, mund të bëhet pengesë për operatorë ekonomie të mundshëm, të cilët mund t’i disponojnë këto produkte në përmasa të tjera, që nuk ndikojnë në cilësinë dhe funksionalitetin e tyre. Përcaktimi i vlerave fikse është një nga format e përdorura nga institucionet, për të favorizuar një kompani të paracaktuar dhe duke skualifikuar në këtë mënyrë kompani të tjera, që mund ta ofrojnë të njëjtin shërbim me kosto më të ulët. Megjithatë shkeljet janë konstatuar edhe më herët nga APP, port ë pakta janë rastet kur ndërmerren hapa të mëtejshëm, për të vendosur në vend ligjshmërinë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.