Tjetër shitje energjie nga KESH – Arkëtohen 2.8 mln euro, të ardhurat nga eksporti arrijnë në 52.3 mln euro

Përveç problemeve të shkaktuara me rrjetin elektrik, apo qarkullimin e automjeteve në disa zona, rreshjet e ditëve të fundit janë pasuar me efekte pozitive për Korporatën Elektroenergjetike Shqiptare, që ka realizuar disa procedura shitjeje energjie, për shkak të përmirësimit të situatës hidrike në Kaskadën e lumit Drin.

Vetëm në procedurën e fundit, Korporata ka shitur 25800 mWh energji, në 2 lote të ndarë teksa referuar çmimit të shitjes, rezulton se janë arkëtuar 2.8 mln euro. Kjo shumë i shtohet të ardhurave që janë siguara nga eksporti i energjisë përgjatë gjithë këtij viti, që sipas përllogaritjeve të TV SCAN shkon në 52.3 mln euro.

Pjesa më e madhe e tyre u arkëtua në 6 muajt e parë të këtij viti, me 41.5 mln euro. Ndërkohë që, vetëm me tenderët e shitjes së energjisë për muajin nëntor KESH sipas të dhënave të publikuara nga KESH rezultojnë të ardhura, në vlerën e 10.8 mln euro.

Ndërkaq, ndryshe paraqitet situata për Furnizuesin e Tregut të Lirë, që është pjesë e OSHEE Group që për vitin 2023 nuk ka kryer procedura shitje të energjisë, çka nënkupton se nuk ka patur teprica pas plotësimit të nevojave konsumatore.

Rreferuar legjislacionit në fuqi, shoqëria publike e furnizimit në tregut e lirë ka detyrimin për blerjen e energjisë elektrike nga burimet e rinovueshme të energjisë. Fillimisht, kjo energji tregtohet për mbulimin e humbjeve të Operatorit të Sistemit të Shpërndarjes me të njëjtin çmim me të cilin e blen këtë energji nga prodhuesit me përparësi të energjisë elektrike. Ndërkohë që, në rast të tepricave të krijuara ato tregtohen në treg të parregulluar me çmimin që ofron ky treg.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.