“Trashja” e qeseve rrit kostot – VËZHGIMI/ Qytetarët vijojnë t’i përdorin. Supermarketet, të furnizuar me qeset e lejuara

Pavarësisht se 1 qershori shënon ndalimin e përdorimit të qeseve të holla plastike, një vëzhgim i TV SCAN në terren tregon se qytetarët vijojnë t’i përdorin. Ata thonë se janë në dijeni që mund të gjobiten për këtë shkelje, por shtojnë se dita e parë e zbatimit të rregullave të reja i ka gjetur të papërgatitur.

Edhe tregtarët e fruta – perimeve kanë vijuar shitjen me qeset e holla, pasi sipas tyre kanë patur sasi që i kanë blerë më herët e për pasojë janë detyruar t’i konsumojnë. Nga ana tjetër ata thonë se zëvendësimi i qeseve të holla, me qese më të trasha rrit kostot e operimit të biznesit, në rast se qesja do të vijojë të ofrohet prej tyre. Në të kundërt, kostoja do i faturohet qytetarit.

Ndërkaq, ndryshe paraqitet situata në supermarkete. Këto njësi tregtare janë pajisur me qeset e reja që do të lejohen të përdoren, teksa vlera me të cilin mund ta blejnë qytetarët është rritur në 15 lekë, nga 10 lekë që ishte përpara hyrjes në fuqi të ndryshimeve ligjore.

Po ashtu, nuk mungojnë qytetarët, që kanë nisur të marrin trastat me vete, për të evituar kostot e rritura, por edhe përdorimin e plastikës.

Ndryshimet ligjore parashikojnë ndalimin e prodhimit, importimit dhe përdorimit të qeseve plastike nën 70 mikron e që mund të mbajnë nën 10 kg. Ndërkohë që, shkeljet ndëshkohen me gjobë.

Më konkretisht, çdo person, që hedh në treg, prodhon, importon apo fut në territorin e Republikës së Shqipërisë qeset e ndaluara, dënohet me gjobë që varion nga 1-1.5 mln lekë. Ndërkohë që, përdoruesit gjobat variojnë nga 30 – 100 000 lekë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.