Tregjet mbushen me vaj ulliri fals – Europol: Është bërë i zakonshëm në vendet që e prodhojnë!

Rreth 260.000 litra vaj ulliri u sekuestruan në operacionin OPSON, i cili synonte grupet kriminale të përfshira në rishitjen e ushqimeve të falsifikuara ose të prishura.

Në një aksion të përbashkët të policisë italiane dhe spanjolle u arrestuan 11 persona dhe Europol konfirmoi se sasia e konsiderueshme e vajit të ullirit fals u shit si origjinal – pra si “vaj ulliri ekstra i virgjër”.

Shitja e vajit të ullirit fals, paralajmëron Europol, është bërë e zakonshme në vendet prodhuese të vajit të ullirit si Spanja dhe Italia.

Është konstatuar se anëtarët e grupeve të organizuara kriminale të përfshira në mashtrime ushqimore përdorin një variant më të keq të vajit të ullirit për të holluar produktin e tyre.

Vaji i ullirit fals, karakterizohet nga aciditeti i shtuar, shije të padëshirueshme dhe erë jashtëzakonisht të pakëndshme, për këtë arsye nuk është i përshtatshëm për konsum.

Europol sqaron gjithashtu se termi ‘lampante’ që po përdoret për këtë lloj vaji rrjedh nga përdorimi i tij historik kur përdorej si lëndë djegëse në llambat e naftës.

Sipas Europolit, shfaqja e vajit të ullirit fals është një ndërthurje e rrethanave të ndryshme, si inflacioni, reduktimi i prodhimit të vajit të ullirit dhe rritja e kërkesës.

Në bastisjet në Itali dhe Spanjë u sekuestruan katër automjete, 91 mijë euro dhe dokumente të ndryshme. Hetuesit italianë kontrolluan tre fabrika të vajit të ullirit në Siçili dhe Toskanë, të cilat dyshoheshin se prodhonin vaj ulliri fals.

Ata i kërkuan pronarit listën e klientëve, dokumentacionin dhe u morën mostrat e vajit të ullirit. Njëra prej këtyre kompanive u gjobit për etiketim jo të duhur të produktit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.