Tregu i monedhave, me ndryshime të vogla – Rriten bastet se Rezerva Federale e ka mbyllur ciklin shtrëngues

Dollari amerikan e ka nisur këtë javë në rritje të lehtë, pas komenteve të kujdesshme nga shefi i Rezervës Federale Jerome Powell, ndërsa investitorët po presin të dhënat mbi punësimin në SHBA, që mund të japin një panoramë më të qartë mbi politikat monetare. Powell tha të premten se ishte e qartë se politika monetare e SHBA-së po ngadalësonte ekonominë në linjë me parashikimet, ndërsa norma bazë e interesit është në një territor kufizues.

Ndërsa Powell ripërsëriti se FED është e përgatitur të shtrëngojë politikat monetare nëse do të jetë e nevojshme, tregtarët janë të bindur se cikli i rritjes së interesave ka përfunduar. Tregjet vlerësojnë 60% mundësi për uljen e interesave në mars, krahasuar me vetën 21% një javë më parë. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 103.2.

Ndërkohë, në raport me jenin japonez, dollari ka zbritur në rreth 146.5, niveli më i ulët që nga 11 shtatori, ndërsa paundi britanik po qëndron pranë nivelit më të lartë në 3 muajt e fundit, prej 1.2680.

Tregjet e monedhave mund të ndikohen gjithashtu nga fjalimet e disa zyrtarëve të Bankës Qendrore Evropiane përpara se të publikohen disa raporte ekonomike nga rajoni, duke përfshirë të dhënat e rishikuara mbi produktin e brendshëm bruto për tremujorin e tretë për Eurozonën të enjten. Inflacioni në Eurozonë ra në 2.4% për nëntorin, duke i lejuar Bankës Qendrore Europiane të konsiderojë uljen e interesave vitin e ardhshëm. Euro po tregtohet në rreth 1.087 dollarë, nivel i ngjashëm me mbylljen e ditës së premte.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.