Tregu i naftës, në pritje të OPEC+ / Pritet të realizojë fitimet e para javore në 5 javët e fundit

Nafta Brent e Londrës po tregtohet e qëndrueshme në sesionin e sotëm, pasi investitorët tregohen të kujdesshëm, në pritje të takimit të OPEC+, që zhvillohet të enjten e ardhshme. Brenti i Londrës po tregtohet në mbi 81 dollarë për fuçi, ndërsa nafta Bruto amerikane po qëndron në rënie dhe po tregtohet në rreth 76 dollarë për fuçi. Të dyja kontratat pritet të realizojnë fitimet e para javore në 5 javët e fundit, të mbështetura nga shpresat se grupi i prodhuesve OPEC+, i udhëhequr nga Arabia Saudite, mund të zvogëlojë ofertën për të balancuar tregun në vitin 2024.

Por, Organizata e Vendeve Eksportuese të Naftës (OPEC) dhe aleatët e tjerë, që ndryshe njihen si OPEC+, befasuan tregun me një njoftim të mërkurën se do të shtynin takim ministror me katër ditë, deri në 30 nëntor, pasi prodhuesit po përpiqen të arrijnë një konsensus mbi nivelet e prodhimit gjatë vitit të ardhshëm. Kjo shtyrje e mbledhjes bëri që çmimet e naftës të binin me rreth 4% të mërkurën. Ndërkohë, volumet tregtare mbeten të ulëta për shkak të festës së Falënderimeve në Shtetet e Bashkuara.

Në anën tjetër, tregu ka gjetur një mbështetje nga perspektiva afatshkurtër ekonomike në Kinë, pasi disa të dhëna dhe ndihma e re për sektorin e pronave me borxhe kanë përmirësuar humorin e intestitorëve. Megjithatë, këto fitime mund të kufizohen nga rritja e rezervave të naftës në SHBA dhe nga marzhet e dobëta të rafinimit. Ndërkohë, rritja e prodhimit nga vendet që nuk janë pjesë e OPEC do të mbetet e fortë, me kompaninë shtetërore braziliane të energjisë Petrobras që planifikon të investojë 102 miliardë dollarë gjatë pesë viteve të ardhshme, për të rritur prodhimin në 3.2 milion fuçi nafte në ditë deri në vitin 2028.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.