Turqia po mburret haptazi se tregtia e automjeteve me Rusinë është rritur – Eksportet drejt Rusisë arritën nivelin më të lartë në 8 vite!

Pas pushtimit rus të Ukrainës, shumë vende e kanë goditur Rusinë me sanksione gjithëpërfshirëse dhe kanë minimizuar marrëdhëniet e tyre me Kremlinin. Turqia, nga ana tjetër, po e ruan këtë marrëdhënie dhe madje është mburrur për një rritje të tregtisë me Rusinë.

Ministri turk i transportit Adil Karaismailoglu shkroi në Twitter njoftimin e Drejtorisë së Përgjithshme Detare të vendit për një rritje prej 58% në numrin mesatar mujor të automjeteve të tregtuara me Rusinë.

Nga maji deri në korrik, Turqia dhe Rusia tregtuan 8,213 automjete ndërmjet tyre nëpërmjet anijeve të mallrave çdo muaj, nga mesatarja mujore prej 5,208 nga janari në prill. Autoriteti turk ia atribuoi rritjes linjave të reja të anijeve midis dy vendeve.

Në përgjithësi, tregtia midis dy vendeve ka lulëzuar, me eksportet turke në Rusi që arrijnë në 2.91 miliardë dollarë në gjysmën e parë të 2022, sipas Institutit zyrtar të Statistikave Turke, ose TurkStat. Ky është një nivel më i lartë në tetë vjet, sipas një analize të Bloomberg të të dhënave të TurkStat.

Ankaraja e ka dënuar pushtimin rus të Ukrainës, por nuk e ka sanksionuar Rusinë apo nuk ka mbyllur hapësirën e saj ajrore ndaj vendit. Lidhjet mes dy vendeve duket se po thellohen, pasi pesë nga bankat e Turqisë kanë filluar të përdorin sistemin rus të pagesave Mir, duke ngritur shqetësimin se ai mund të përdoret për të shmangur sanksionet.

Në fillim të këtij muaji, presidenti turk Rexhep Tajip Erdogan u takua me Presidentin rus Vladimir Putin në qytetin turistik të Soçit, duke shënuar takimin e tyre të dytë vetëm tre javë pasi u takuan në Iran.

Duke qenë se Turqia është një anëtare e NATO-s, marrëdhënia e saj me Rusinë po shqetëson zyrtarët perëndimorë, disa prej të cilëve po mendojnë për veprime ndëshkuese për vendin, të tilla si t’u kërkojnë kompanive të reduktojnë financimin për firmat turke, raportoi Financial Times më 7 gusht. Asnjë zyrtar nuk ka folur për veprime të tilla për Turqinë deri më tani, shtoi media.

Ekonomia e brishtë e Turqisë do të thotë se Ankaraja ka shumë në rrezik kur bëhet fjalë për marrëdhëniet e saj ekonomike me Rusinë, e cila është një nga partnerët e saj kryesorë tregtarë. Turqia është gjithashtu destinacioni kryesor për turistët rusë, me 7 milionë prej tyre të vizituar në vitin 2019, sipas Nikkei.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.