Udhëheqësit europianë i kërkojnë Serbisë që të njohë Kosovën ‘de facto’!

Udhëheqësit e Francës, Gjermanisë dhe Italisë i kërkuan Serbisë të premten që “të ofrojë njohjen de-facto” të Kosovës, e cila shpalli pavarësinë në vitin 2008, por që Beogradi ka vazhduar ta konsiderojë si krahinë të saj.

Në një deklaratë një ditë pas bisedimeve me të dyja palët, presidenti francez Emmanuel Macron, kancelari gjerman Olaf Scholz dhe kryeministrja italiane Giorgia Meloni thanë se ishte koha që fqinjët ballkanikë të përmbushin angazhimet e mëparshme.

Lëvizja e tyre vjen pas shqetësimeve në rritje ndërkombëtare se ish-armiqtë e kohës së luftës mund të kthehen në konflikt të hapur pas një sërë incidentesh të dhunshme në muajt e fundit. Pjesa më e madhe e tensionit është fokusuar në Kosovën veriore, ku serbët etnikë përbëjnë shumicën. Pjesa tjetër e Kosovës është kryesisht shqiptare etnike.

Në deklaratën e tyre, Macron, Scholz dhe Meloni përsëritën thirrjet e kahershme që kryeministri i Kosovës Albin Kurti të themelojë një asociacion të komunave me shumicë serbe në veri, duke u dhënë serbëve lokalë një shkallë të vetëqeverisjes.

Serbia dhe Kosova kanë kaluar vite në bisedime të ndërmjetësuara nga Bashkimi Europian për të normalizuar marrëdhëniet e tyre. Ndërsa ky proces ka ngecur, udhëheqësit e tre vendeve më të mëdha të BE-së janë përfshirë gjithnjë e më shumë në përpjekjet për të rikthyer marrëdhëniet në rrugën e duhur.

Ndërsa BE më parë i është shmangur çështjes së ndjeshme politikisht të njohjes de facto të Kosovës, tre liderët e kanë bërë të qartë se kjo ishte ajo që prisnin nga Serbia, duke ushtruar presion mbi presidentin serb Aleksandar Vuçiq.

“Ne i bëjmë thirrje Kosovës që të nisë procedurën për themelimin e Asociacionit të Komunave me Shumicë Serbe në Kosovë siç është përshkruar në draft Statut dhe Serbisë që të bëjë njohjen de-facto”, thuhet në deklaratë. Vuçiq ka thënë më parë se nuk do ta njohë as zyrtarisht dhe as joformalisht Kosovën.

Por si Serbia ashtu edhe Kosova aspirojnë të anëtarësohen në BE një ditë dhe blloku ka këmbëngulur se të dyve do t’u duhet të zgjidhin mosmarrëveshjet e tyre përpara se të bëhen anëtarë. “Pa përparim në normalizimin e marrëdhënieve, të dyja palët rrezikojnë të humbasin mundësi të rëndësishme,” thanë tre udhëheqësit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.