Ulen çmimet e gazit në SHBA – Për 21 ditë rradhazi cmimet e gazit në vend kanë shënuar rënie

Çmimet e gazit në Shtetet e Bashkuara të Amerikës kanë shënuar rënie për 21 ditë rradhazi. Konsumi i karburantit ka arritur pikën më të ulët për këtë periudhë të vitit që nga viti 2014, duke përjashtuar vitin 2020.

Çmimet e gazit në Shtetet e Bashkuara të Amerikës kanë arritur nivele rekord në vitin 2022, por tregjet janë lehtësuar gjatë javëve të fundit edhe në mes të sezonit veror të udhëtimeve me automjete dhe luftës që vazhdon në Ukrainë.

Në mesin e muajit qershor, të 50 shtetet paguanin mbi 4.4 dollarë për gallon, me disa qytete të Kalifornisë që paguanin mbi 6.4 dollarë dhe në një qytet madje çmimet shkuan deri në 10 dollarë për gallon.

Por çmimet në pikat e shitjes janë ulur për 21 ditë rresht, sipas të dhënave zyrtare. Mesatarja aktuale për çmimet e gazit në SHBA është 4.8 dollarë për gallon, nga 4.9 dollarë një javë më parë, por ende e lartë në krahasim me mesataren e një viti më parë prej 3.1 dollarësh.

Kërkesa gjithashtu ka rënë. Konsumi i karburantit ka arritur pikën më të ulët për këtë periudhë të vitit që nga viti 2014, duke përjashtuar vitin 2020, duke sugjeruar se tregu i ngushtë i gazit në SHBA është ftohur, të paktën përkohësisht.

Stoqet e produktit kryesor janë rritur me mbi 4 milionë fuçi gjatë dy javëve të fundit, sipas Bloomberg, edhe pse këto shifra zakonisht lëvizin në drejtim të kundërt gjatë kësaj periudhe të vitit.

Tendencat e fundit të tregut tregojnë rezultate të mira për presidentin Joe Biden pasi ai përballet me opsione të kufizuara politikash për uljen e kostove të karburantit. Propozimi i tij i fundit për të pezulluar taksën federale të gazit u hodh poshtë.

Pavarësisht nga niveli aktual i humbjeve, analistët parashikojnë një treg të ashpër të energjisë, si pasojë e çmimeve të larta të naftës, rezervave të ulëta të naftës së papërpunuar dhe rafinerive që funksionojnë afër kapacitetit të plotë. Analistët e JPMorgan parashikuan se gazi mund të rritet mesatarisht mbi 6 dollarë për gallon në SHBA.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.