Vazhdon eksporti i drithërave nga Ukraina – Tri anije me rreth 58 mijë ton misër drejt Turqisë e Britanisë!

Tri anije transporti me rreth 58,000 ton misër në bord u nisën nga portet e Ukrainës drejt Irlandës, Britanisë së Madhe dhe Turqisë.

Dy javë pas përfundimit të marrëveshjes për eksportin e prodhimeve bujqësore nga Ukraina, tri anije të tjera të ngarkuara me drithëra dhe ushqime u larguan nga portet ukrainase të Detit të Zi, dy nga porti Chornomorsk dhe një nga Odesa.

Sipas ministrit ukrainas të Infrastrukturës, Olexander Kubrakov, tri anijet e transportit “Navistar”, “Rojen” dhe “Polarnet” kishin rreth 58 mijë ton misër në bord.

Destinacioni i tyre është Irlanda, Britania e Madhe dhe Turqia, u tha nga ministria. Sipas Ministrisë turke të Mbrojtjes edhe një anije transporti bosh do të niset për në një port ukrainas pas inspektimit në Stamboll.

Ndërkohë Ukraina po kërkon që marrëveshja e eksportit të grurit në Detin e Zi të shtrihet edhe për mallra të tjera.

Marrëveshja ka të bëjë me logjistikën dhe me lëvizjen e anijeve në Detin e Zi, tha zëvendësministri i Ekonomisë Taras Katshka për Financial Times, dhe kur flitet për mallra nuk ka asnjë ndryshim midis grurit dhe mineralit të hekurit, për shembull.

E . S / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.