Zbulimi i jashtëzakonshëm shkencor – Vrimat e zeza mund të furnizojnë Tokën me energji elektrike?
Në një hulumtim të kohëve të fundit, dy shkencëtarë kinezë të Universitetit Tianjin, në Kinë, propozojnë një burim të ri energjie shumë jokonvencional: vrimat e zeza primordiale. Ndryshe nga vrimat e zeza të njohura zakonisht me masë yjore, këto entitete të vogla, të formuara teorikisht nga mbidensiteti në plazmën fillestare pas Big Bang-ut, mund të jenë vendimtare për nevojat e botës sonë për energji.
Duke marrë parasysh faktin se një vrimë e zezë ka një forcë gravitacionale jashtëzakonisht të fortë, lind një pyetje interesante: duke e parë atë teorikisht, a mund të përdorim forcën gravitacionale të vrimave të zeza për të prodhuar energji elektrike, d.m.th. a duhet t’i përdorim vrimat e zeza si bateri? Shkencëtarët kinezë Mai dhe Yang pyesin në studimin e tyre, duke sugjeruar përdorimin e mundshëm të një vrime të zezë Schwarzschild – një vrimë e zezë që nuk ka ngarkesë elektrike, si një bateri e ringarkueshme.
Megjithatë, ata pranojnë se ka edhe një sfidë në formën e rrezatimit Hawking, të emetuar nga vrimat e vogla të zeza. Pavarësisht nga kjo pengesë, llogaritjet e tyre zbulojnë se një vrimë e tillë e zezë brenda një diapazoni të caktuar masiv mund të rimbushet për të prodhuar energji elektrike, me një normë efikasiteti maksimal prej 25 %.
Në afërsi të një vrime të zezë primordiale, 25 % e masës së një grimce alfa të prodhuar nga zbërthimi radioaktiv mund të shndërrohet në energji kinetike, shpjegojnë Mai dhe Yang, duke barazuar efektin e këtyre vrimave të zeza me atë të një reaktori bërthamor.
Megjithëse testimi i konceptit të tyre mbetet jopraktik dhe aktualisht përtej mundësive tona teknologjike, shkencëtarët kinezë propozojnë një ide joshëse – që vrimat e zeza në miniaturë mund të ekzistojnë brenda intervalit masiv të propozuar për materien e errët. Nëse konfirmohet, kjo hap derën për një skenar intrigues, përkatësisht përdorimin e një prej formave më enigmatike të materies në univers për të fuqizuar pajisjet e përditshme.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.