Zhvillimi i turizmit kulturor – BERZH, tender për Kalanë e Beratit. Ndërhyrje për përmirësimin e aksesit

Banka Evropiane për Rindërtim dhe Zhvillim ka hapur tenderin për përmirësimin e potencialit të turizmit kulturor nëpërmjet ndërhyrjeve në Kalanë e Beratit, duke synuar rritjen e atraktivitetit turistik të këtij destinacioni. Kjo përmes përmirësimit të aksesit në këtë atraksion turistik.

Sipas BERZH objektivi kryesor i kontratës është ekzekutimi i zgjidhjes më të mirë teknike dhe kosto/efektive për realizimin e një mbrojtjeje të qëndrueshme të lumit Osum, duke ndaluar erozionin progresiv të brigjeve të lumit pranë rrugëve në afërsi të kalasë.

Rritja e atraktivitetit turistik të Kalasë së Beratit është pjesë e projektit për Infrastrukturën dhe Turizmin në Shqipëri, që financohet nga Bashkimi Evropian nëpërmjet asistencës teknike dhe granteve të investimeve në një shumë totale prej 40 milionë euro, si dhe nga kredia sovrane plotësuese e dhënë nga BERZH për qeverinë e Shqipërisë.

Sipas të dhënve të fundit nga Ministria e Turizmit dhe Mjedisit, janari i këtij viti shënoi një rritje prej 50 % të vizitorëve në institucionet kulturore, krahasuar me të njëjtën periudhë të një viti më parë.

Numri më i madh i vizitorëve u shënua në Muzeun Historik të Tiranës, i ndjekur nga Parku Arkeologjik i Shkodrës. Kalanë e Beratit në janar të këtij viti e vizituan 3835 vizitorë, duke u renditur e para nga kalatë në të gjithë vendin.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.