Zjarret djegin një zonë 3 herë më të madhe se Luksemburgu – Regjistrohen viktima në Itali dhe Austri nga stuhitë e dhunshme!

Stuhitë e dhunshme në Europën Qendrore kanë vrarë të paktën shtatë persona, duke përfshirë dy fëmijë, dhe kanë dëmtuar rëndë një numër ndërtesash. Të paktën dy persona humbën jetën dhe 18 të tjerë u plagosën pasi erërat e forta goditën rajonin italian të Toskanës.

Më shumë se 100 njerëz u evakuuan nga shtëpitë e tyre për të qëndruar në akomodime emergjente në shkolla dhe palestra, sipas agjencisë italiane të mbrojtjes civile. Një burrë në Lucca dhe një grua në Carrara u vranë nga rrëzimi i pemëve, sipas mediave italiane.

Ndërkohë, katër persona u plagosën në kampingun bregdetar të Marina di Massa dhe katër të tjerë u shtruan në spital në qytetin mesjetar Barga pasi automjeti i tyre u godit nga një çati e dëmtuar. Stuhia dëmtoi edhe disa fragmente të kambanores së famshme të Bazilikës së Shën Markut në Venecia.

Erërat e forta deri në 120 km/h dhe shiu i rrëmbyeshëm rrëzuan pemët dhe shkaktuan përmbytje në të gjithë vendin të enjten. Autoritetet në Milano kanë vendosur të mbyllin parqet e qytetit të premten. Qytetarëve u është bërë thirrje që të shmangin parkimin apo ecjen poshtë pemëve dhe të heqin çdo send të lirë nga ballkonet e tyre.

Rajoni i Lazios ka parashikuar gjithashtu reshje shiu dhe erëra të forta nga mbrëmja e së enjtes dhe gjatë gjithë të premtes. Ndërkohë, tre të rritur dhe dy fëmijë të vegjël u vranë, ndërsa dhjetëra të tjerë u plagosën në jug të Austrisë. Fëmijët, që raportohet të moshave pesë deri në tetë, ishin pranë një liqeni të vogël në Carinthia kur disa pemë u shkulën nga rrëmbimet e erës, tha zëdhënësja e Kryqit të Kuq për shtetin austriak, Melanie Reiter.

Ishulli francez i Korsikës në Mesdhe u godit gjithashtu nga stuhi të forta, ku të paktën pesë persona humbën jetën dhe disa të tjerë u plagosën. Zjarret pyjore kanë djegur një rekord prej 700,000 hektarësh në BE deri më tani këtë vit, sasia më e madhe që nga fillimi i regjistrimeve.

Sipërfaqja prej 700,000 hektarësh është gati tre herë më e madhe se Luksemburgu ose afërsisht e njëjta madhësi me Azerbajxhanin. Shifrat nga Sistemi Europian i Informacionit për Zjarret në Pyje (EFFIS) tregojnë se Spanja ka qenë më e goditura deri më tani me më shumë se 283,000 hektarë të djegur. Pasohet nga Rumania (150.735), Portugalia (86.631), Franca (62.102), dhe Italia (42.835).

Numri i zjarreve është rritur gjithashtu vitet e fundit me më shumë se 2,300 zjarre të regjistruara në të gjithë bllokun nga mesi i gushtit, shumë mbi mesataren gjatë periudhës 2006-2021 prej 1,349 zjarresh. Qendra e Përbashkët e Kërkimeve të Komisionit Europian tha se mund të jetë më e keqja në 500 vitet e fundit. Sipas Komisionit Europian, gjatë dy muajve të fundit, 29 avionë dhe tetë helikopterë janë vendosur në të gjithë bllokun përmes Mekanizmit të Mbrojtjes Civile të BE-së, i cili është një mënyrë për vendet e BE-së për të ndarë burimet gjatë situatave emergjente.

Përballë këtij realiteti të ri, KE është zotuar të financojë blerjen nga shtetet anëtare të 12 avionëve të rinj zjarrfikës, por të parët nuk pritet të hyjnë në funksion përpara vitit 2026, ndërsa të gjithë janë planifikuar të jenë online deri në vitin 2029. Rezerva aktuale e BE-së për të luftuar zjarret në pyje përbëhet këtë vit nga 12 avionë zjarrfikës dhe një helikopter që janë huazuar nga Kroacia, Franca, Greqia, Italia, Spanja dhe Suedia.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.