Zyrtarët ukrainas me një nismë diplomatike për anëtarësim të shpejtë në BE – Macron: Mund të duhen 20 vjet që Ukraina të bëhet anëtare

Zyrtarët ukrainas po ndërmarrin një nismë të përbashkët diplomatike për të nisur rrugëtimin e vendit drejt anëtarësimit në BE, pasi skepticizmi mbetet në një numër kryeqytetesh të Evropës Perëndimore për një qasje të shpejtë.

Që nga pushtimi i Rusisë, shumë në Evropë, duke përfshirë Ursula von der Leyen, presidenten e Komisionit Evropian, kanë folur në favor të vendosjes së Ukrainës në një rrugë të shpejtë drejt anëtarësimit në BE duke i dhënë asaj statusin e kandidatit.

Megjithatë, ka ende dyshime në Berlin, Paris dhe kryeqytete të tjera nëse është e mundur të fillohet tashmë procesi zyrtar, përpara një samiti të liderëve në fund të këtij muaji që pritet të vendosë për këtë çështje.

“Do të jetë shumë e vështirë të thuash jo, por do të jetë edhe më e vështirë të thuash po”, tha një diplomat evropian i informuar mbi diskutimet.

Vendimi ka të ngjarë të zbresë në diskutim personal midis liderëve evropianë në samit, me qëndrimet e Emmanuel Macron të Francës dhe Olaf Scholz të Gjermanisë që shihen si vendimtare.

Disa njerëz kanë paraqitur alternativa, të tilla si dhënia e një angazhim për Ukrainën për statusin e kandidatit më vonë, ose pranimi i saj në një kuadër më të gjerë dhe më të lirë të vendeve pa dhënien e anëtarësimit të plotë.

Olha Stefanishyna, zëvendëskryeministrja e Ukrainës me përgjegjësi për integrimin evropian, tha se secili prej këtyre rezultateve do të ishte jashtëzakonisht zhgënjyes. “Nëse liderët europianë vazhdojnë të ecin në të njëjtën mënyrë si përpara 24 shkurtit, për sa i përket shpejtësisë, paqartësisë dhe mungesës së vullnetit për të irrituar Putinin, ky do të ishte një dështim i madh i Europës si projekt”, tha ajo në një intervistë nga Parisi, të cilën ajo po e vizitonte si pjesë e një turneu evropian për të fituar mbështetës për statusin e kandidatit.

“Ukraina dëshiron një angazhim ligjor dhe jo një premtim politik”, shtoi ajo, duke përmendur memorandumin e Budapestit të vitit 1994, sipas të cilit Ukraina hoqi dorë nga armët e saj bërthamore dhe premtimin e vitit 2008 për anëtarësimin e ardhshëm në NATO, si premtime që perëndimi nuk i kishte përmbushur duke e bërë Ukrainën më të dobët politikisht.

Një muaj më parë, presidenti ukrainas Volodymyr Zelenskiy tha se Ukrainës duhet t’i jepet statusi i kandidatit “tani, në kushte lufte, brenda kornizës së një procedure speciale të shkurtuar për anëtarësimin në BE”.

Statusi i kandidatit është vetëm hapi i parë në një proces të gjatë të marrjes së anëtarësimit të plotë, por edhe ky vendim është në pikëpyetje, me Francën, Gjermaninë, Holandën dhe vendet nordike mes skeptikëve. Macron ka thënë se mund të duhen 20 vjet që Ukraina të bëhet anëtare e BE-së.

N. Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.