1.87 milion euro për trajnimin e kontrollorëve të trafikut ajror – Albcontrol hap tenderin, kurs për 30 kandidatë

Mbi 1.87 mln euro, pa TVSH parashikohet të kushtojë kursi për formimin profesional të 30 kontrollorëve të trafikut ajror. Albcontrol ka hapur tenderin mbi kufirin e lartë monetar, ndërkohë që kompanitë e interesuara kanë 1 muaj afat për dorëzimin e ofertave.

Referuar dokumenteve të tenderit, pjesëmarrësit në trajnim janë kandidatë që nuk kanë njohuri sa i përket aviacionit. Ata janë selektuar nga Testi i Parë Evropian i Përzgjedhjes së Kontrollorit të Trafikut Ajror (FEAST), që është një grup testesh që ndihmon Ofruesit e Shërbimeve të Navigimit Ajror për të identifikuar kandidatët më të përshtatshëm për punën e një kontrollori të trafikut ajror. Formimi i këtyre profesionistëve mori një rëndësi të veçantë rreth 2 vjet më parë, kur kontrollorët e trafikut ajtor të Albcontrol firmosën deklaratën e paaftësisë së përkohshme për shkak të stresit të vazhdueshëm, si pasojë e uljes së pagave të tyre prej datës 24 prill 2020.

Kjo solli bllokimin e fluturimeve nga aeroporti “Nënë Tereza”, pasi tregu shqiptar nuk kishte profesionistë për zëvendësimin e tyre. Kjo situatë nxorri në pah edhe mungesën e tyre për funksionimin e aeroportit të Kukësit, që gjithsesi nuk kryen fluturime përgjatë gjithë vitit. Ndërkaq, hapja e tenderit për kursin e 30 kontrollorëve të rinj vjen në një kohë kur një tjetër aeroport po ndërtohet në Vlorë.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.